Ադրբեջանը չի մասնակցել ԵԱՏՄ նիստին, քանի որ Հայաստանը չի համաձայնել. Մհեր Գրիգորյան

Հայաստանը չի համաձայնել Ադրբեջանի ներկայացուցչի մասնակցությանը ԵԱՏՄ միջկառավարական խորհրդի նիստին։ Կազանում տեղի ունեցած ԵԱՏՄ միջկառավարական խորհրդի նիստից հետո Հանրային հեռուստաընկերության հետ զրույցում այս մասին ասել է փոխվարչապետի պաշտոնակատար Մհեր Գրիգորյանը։

«ԵԱՏՄ միջկառավարական խորհրդի նիստին որևէ երրորդ երկրի մասնակցության համար անհրաժեշտ է կոնսենսուսային որոշում: Բնականաբար, այդ հարցում կոնսենսուս չի եղել, մասնավորապես, Հայաստանը չի համաձայնել Ադրբեջանի ներկայացուցչի մասնակցությանը նիստին»,- ասել է Գրիգորյանը:

Պատասխանելով ճշգրտող հարցին՝ հայկական կողմի դիրքորոշումը արդյո՞ք կապված է եղել ռազմագերիների խնդրի հետ, Գրիգորյանը հիշեցրել է՝ նախկինում մեկ անգամ ևս խոսել է այդ մասին:

«Հարցը շատ բազմաբաղադրիչ է, և հիմա չէի ուզենա կոնտեքստից հանել մի պայման կամ նախապայման: Կոնսենսուս չի եղել այդ հարցում, իսկ նման մասնակցության համար անհրաժեշտ էր բոլոր անդամ երկրների մասնակցությունը»,- ամփոփել է Գրիգորյանը:

Հիշեցնենք՝ Կազանում ապրիլի 29-30-ը կայացավ ԵԱՏՄ միջկառավարական խորհրդի նիստը, որին մասնակցում էր նաև Նիկոլ Փաշինյանի գլխավորած պատվիրակությունը։