Ազգային գիտական լաբորատորիայի նոր կրիոգեն կայանը կօգնի բարձր որակի թթվածնի արտադրման գործում

Ա. Ի. Ալիխանյանի անվան ազգային գիտական լաբորատորիան կունենա նոր կրիոգեն կայան, արդիականացման գործընթացն սկսված է:  «Ա. Ի. Ալիխանյանի անվան ազգային գիտական լաբորատորիա (Երևանի ֆիզիկայի ինստիտուտ)» հիմնադրամի գիտական քարտուղար Արփինե Փիլոյանը մամլո ասուլիսում նշեց, որ պայմանագիրն արդեն կնքված է:

«Ազգային գիտական լաբորատորիայի տնօրեն Անի Ապրահամյանի, Հայկական բժշկական միջազգային կոմիտեի, ամերիկահայ բժշկական համայնքի ջանքերով հնարավոր է եղել արդիականացման համար գումար գտնել: Պայմանագիրը կնքված է, նոր կայանը սկսել են պատրաստել, հինգ ամսից կունենանք նոր արդիականացված կայան, որը գրեթե չի զիջում նախորդին: Կրիոգեն կայանն ավելի մեծ թափով կօգնի բարձր որակի թթվածնի արտադրման գործում և ոչ միայն, նախատեսված է նաև ազոտի արտադրություն, որը օգտակար կլինի անվտանգության հարցերով և որոշ չափումների համար»,-ասաց Արփինե Փիլոյանը:

Գործող կայանը հիմնադրվել է 1978 թվականին: Ստեղծվել էր մի իրավիճակ, ըստ որի, կայանի աշխատանքը վտանգված էր, կարող էր անդառնալի հետևանքներով զարգացում լինել: Ամեն վայրկյան կարող էին սարքավորումները պարզապես չդիմանալ: Հետևաբար, կայանի արդիականացումը խիստ անհրաժեշտություն է: