ԱԺ-ն ընդունեց ՍԴ դատավորների կենսաթոշակի, նոր թեկնածուների առաջադրման հերթականության մասին նախագծերը

80 կողմ, 1 դեմ ձայներով ՀՀ Ազգային ժողովը քիչ առաջ երկրորդ ընթերցմամբ եւ ամբողջությամբ ընդունեց «Իմ քայլը» խմբակցության պատգամավորներ Վահագն Հովակիմյանի եւ Սուրեն Գրիգորյանի ներկայացրած օրենսդրական փոփոխությունների նախագծերը: Կողմ քվեարկեց «Իմ քայլը» խմբակցությունը, դեմ՝ անկախ պատգամավոր Արման Բաբաջանյանը:

«Սահմանադրական դատարանի մասին» օրենքում փոփոխությունների մասին եւ «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում փոփոխություն կատարելու մասին օրենքների նախագծերով ակնկալվում է սահմանել եւ հստակեցնել հունիսի 22-ի Սահմանադրության փոփոխությունների օրենսդրական հիմքերը եւ ապահովել կատարված փոփոխություններին համահունչ՝ Սահմանադրական դատարանի ձեւավորման գործընթացի ավարտը:

Այսպիսով՝ Սահմանադրական փոփոխություններից հետո օրենսդիրները կարգավորեցին նաեւ 12 տարի պաշտոնավարած Ալվինա Գյուլումյանի, Ֆելիքս Թոխյանի ու Հրանտ Նազարյանի կենսաթոշակի հարցը: Մեկ այլ փոփոխությամբ ամրագրվեց դատավորների թափուր տեղերը, ինչպես նաեւ հստակեցվեց, թե դատարանակազմական որ մարմինը պետք է առաջինը թեկնածու առաջադրի, որ այնպես չստացվի՝ մեկ մարմինը վերջնաարդյունքում դատարանում ունենա 4 անդամ, մյուսը՝ 2՝ այդպիսով խախտելով հավասարակշռությունը: