ԱԺ պատգամավորները վերջին անգամ պարգևավճարներ են ստացել 2020-ի փետրվարի համար. Արարատ Միրզոյան

«Բարգավաճ Հայաստան» խմբակցության պատգամավոր Արման Աբովյանը այսօր քառօրյայի ընթացքում անդրադարձավ պարգևավճարների վերաբերյալ «Իմ քայլը» խմբակցության պատգամավոր Սիսակ Գաբրիելյանի հայտարարությանը:

Վերջինս, հիշեցնենք, ավելի վաղ նշել էր, որ «Բարգավաճ Հայաստան» խմբակցությունը ստացել է 45 միլիոն դրամ պարգևավճար, 20 միլիոն և ավելի էլ՝ «Լուսավոր Հայաստան» խմբակցությունը:

«Երբ խոսվում է պարգևավճարների մասին «Բարգավաճ Հայաստան» խմբակցության մասով, ապա հիշեցնեմ ձեզ, որ, չգիտես ինչու, պարոն Գաբրիելյանը չհնչեցրեց, որ «Բարգավաճ Հայաստան» խմբակցության բոլոր պատգամավորները իրենց պարգևավճարները անցած տարի գարնանը փոխանցում էին պանդեմիայի ֆոնդին, պարզ է, որ պատերազմը սկսեց, պատերազմի ֆոնդին: Ես չեմ ուզում լարել իրավիճակը, ուզում եմ պարզապես կոչ անել՝ եթե գնում է կոնստրուկտիվ քննարկում, եթե մենք ասում ենք՝ «Ա», օրինակ, նույն պարգևավճարների մասով, պետք է ասվի նաև «Բ»»,- ասաց Աբովյանը:

Այս ելույթին արձագանքեց ԱԺ նախագահ Արարատ Միրզոյանը: Նա ասաց, որ ԱԺ պատգամավորները պարգևավճար վերջին անգամ ստացել են 2020-ի փետրվարին, դրանից հետո ոչ մի պատգամավոր պարգևավճար չի ստացել: Եվ ԱԺ-ի բազմաթիվ պատգամավորներ՝ անկախ խմբակցությունից, իրենց աշխատավարձերը, մասնակիորեն կամ ամբողջությամբ, փոխանցել են թե՛ կորոնավիրուսի համար նախատեսված դրամահավաքին, թե՛ «Հայաստան» համահայկական հիմնադրամին:

«Լուսավոր Հայաստան» խմբակցության պատգամավոր Աննա Կոստանյանը նույնպես խոսեց պարգևավճարների մասին: Նա ներկայացրեց, թե 2020 թվականի ընթացքում տարբեր պետական կառույցներ որքան պարգևավճար են ստացել՝ նշելով, որ թվերը պաշտոնական հարցումների վրա է հիմնված: «Էլ չեմ խոսում, թե որքան ԱԹՍ-ներ կարելի էր գնել այդ գումարով պատերազմի թեժ օրերին»,- հավելեց նա: