Ամերիկյան նևրոլոգիայի ակադեմիայի գիտնականները պարզել են, որ ալկոհոլի կանոնավոր օգտագործումը կարող է լուրջ հետևանքներ ունենալ ուղեղի առողջության վրա։ Ապրիլին Neurology գիտական հանդեսում հրապարակված հետազոտության արդյունքները ցույց են տվել՝ ալկոհոլը ոչ միայն վնասում է հիշողությունն ու մտածողությունը, այլև մեծացնում է թուլամտության և Ալցհեյմերի հիվանդության զարգացման հավանականությունը։

Հետազոտության շրջանակներում վերլուծվել են մոտ երկու հազար մահացած մարդկանց ուղեղային հյուսվածքներ։ Պարզվել է, որ ալկոհոլ օգտագործողների ուղեղում նկատվել են անոթային վնասումներ և նեյրոդեգեներատիվ հիվանդությունների նշաններ։ Մասնավորապես, արձանագրվել է զարկերակների հիալինոզ՝ վիճակ, որը խաթարում է ուղեղի արյան մատակարարումը։

Հետազոտության արդյունքներով՝ ուղեղի շրջանառության խանգարումները ավելի հաճախ հանդիպել են նախկին ալկոհոլ օգտագործողների մոտ՝ 50%, չափավոր օգտագործողների մոտ՝ 45%, և շատ օգտագործողների մոտ՝ 44%։ Բացի այդ, ալկոհոլի չարաշահող անձանց մոտ անոթային խանգարումների ռիսկը 133%-ով ավելի բարձր է եղել, քան ալկոհոլ չօգտագործողների շրջանում։

Ավելին, ալկոհոլի չարաշահումը կարող է կրճատել կյանքի տևողությունը միջինը 13 տարով։ Այս տվյալները նորից ընդգծում են ալկոհոլի և վաղաժամ մահվան միջև գոյություն ունեցող վտանգավոր կապը։

Ջորջ Վաշինգտոնի համալսարանի բժշկության դոցենտ Լիաննա Վենը նշել է, որ արդյունքները պետք է լուրջ ազդանշան լինեն հանրության համար։ Նրա խոսքով՝ ալկոհոլի վնասակար ազդեցությունը կարող է պահպանվել նաև օգտագործումը դադարեցնելուց հետո։

«Ալկոհոլը երկարաժամկետ վնաս է հասցնում ուղեղին՝ բարձրացնելով թուլամտության և այլ լուրջ հիվանդությունների զարգացման ռիսկը։ Չափազանց կարևոր է գիտակցված մոտեցում ցուցաբերել ալկոհոլի օգտագործմանը և սեփական առողջությանը»,-շեշտել է բժիշկ Վենը։