Ամերիկյան ընկերությունը «Քովիդ-19»-ի բուժման համար Հայաստանին դեղամիջոց կտրամադրի

Ամերիկյան կենսաբուժական «Gilead Sciences» ընկերությունը հայտարարել է, որ Հայաստանին կնվիրաբերի 3000 սրվակ կորոնավիրուսային հիվանդության դեմ օգտագործվող Veklury (Remdesivir) դեղամիջոցը:

Այս մասին հայտնում է Businesswire-ը: Նշվում է, որ ընկերությունը 100 հազար սրվակ էլ կտրամադրի Ինդոնեզիային:

«Քանի որ «Քովիդ-19»-ի դեպքերը կրկին ամբողջ աշխարհում աճում են, և վիրուսը շարունակում է ազդել շատերի կյանքի վրա, մենք շարունակում ենք աշխատել, որ մեր դեղամիջոցները հասնեն նրանց, ովքեր ունեն դրա կարիքը: Այս նվիրատվությունները մեր շարունակական հանձնառության վերջին օրինակն են, և մենք կշարունակենք աշխատել կառավարությունների, առողջապահական մարմինների հետ՝ դեղամիջոցները հնարավորինս արագ հասանելի դարձնելու համար»,- ասել է Gilead Sciences-ի գլխավոր առևտրային պատասխանատու Յոհաննա Մերսիերը:

Gilead-ը սերտորեն համագործակցում է դիստրիբյուտոր գործընկերների և ուղղակիորեն Հայաստանի և Ինդոնեզիայի կառավարությունների հետ՝ այդ նվիրատվությունների գործընթացը համակարգելու համար:

Veklury-ն «Քովիդ-19»-ով հոսպիտալացված հիվանդների բուժման հակավիրուսային ստանդարտն է: Այս պահին Միացյալ Նահանգներում «Քովիդ-19»-ով հոսպիտալացված հիվանդների կեսից ավելին բուժվում է Veklury-ով: Veklury-ը հաստատված կամ լիազորված է ժամանակավոր օգտագործման համար աշխարհի մոտ 50 երկրներում: