Ամոթ է իրենց քաղաքական առաջնորդի կատարածը․ Բադասյանը՝ Թովմասյանի հայտարարության մասին

ՀՀ արդարադատության նախարար Ռուստամ Բադասյանն այսօր լրագրողների հետ ճեպազրույցում անդրադարձավ ՍԴ նախագահ Հրայր Թովմասյանի հայտարարությանը, թե ինքն ամոթ է ապրել ԱԺ-ում տեղի ունեցած գործընթացների համար:

«Ես կարող եմ ասել, որ ինձ մոտ ամոթ է առաջացնում այն, որ կարելի է կյանքի կոչել մի մոդել, ամրագրել այդ մոդելը, այնուհետև ընդամենը մի քանի օր առաջ նախորդ Սահմանադրության խմբագրությամբ ընտրվել ՍԴ նախագահ, որպեսզի պաշտոնավարել ցմահ։ Եվ ամոթ է իրենց քաղաքական առաջնորդի կատարածը, երբ ի լուր աշխարհի ստեց, որ Սահմանադրությունը չի փոխվում իր վերարտադրության համար, բայց կատարվեց այն, ինչ կատարվեց»:

Հարցին, թե ի՞նչ կլինի, եթե Հրայր Թովմասյանը չենթարկվի նոր օրենքին, Բադասյանը նշեց, որ յուրաքանչյուրը պարտավոր է ենթարկվել Սահմանադրությանը։ «Չկա չենթարկվել, պատկերացրեք՝ մի ֆիզիկական անձ փողոցով քայլելիս մտնում է ՍԴ եւ ասում, որ ես դատավոր եմ եւ ես իրականացնելու եմ արդարադատություն»,- նշեց նա։

Խոսելով ՍԴ անդամ Ալվինա Գյուլումյանի հայտարարությունների մասին՝ Բադասյանը նշեց, որ օրենքը Գյուլումյանի վրա նույնպես տարածվում է, քանի որ օրենքի տեքստում գրված է թե՛ պաշտոնի անընդհատության, թե՛ այլ հանգամանքների մասին։ Նախարարը նշեց նաև, որ Ալվինա Գյուլումյանի իրավունքն է դիմել վարչական դատարան և ունենալ արդար դատաքննության իրավունք։