Այս գիշեր զոհված 38-ամյա սպան 44-օրյա պատերազմի մասնակից էր, ունի երկու անչափահաս երեխա

Ադրբեջանական ագրեսիայի հետևանքով այս գիշեր զոհված ավագ լեյտենանտ Հայկ Գևորգյանը Գեղարքունիքի մարզի Հացառատ թաղամասից էր: 38-ամյա սպան ամուսնացած էր, ունի երկու անչափահաս որդի: 

Պարտադիր զինվորական ծառայությունն ավարտելուց հետո նա որոշել է շարունակել ծառայությունը: Զինվորական տարբեր մասնագիտություններին տիրապետող Հայկը սկզբում եղել է ենթասպա, այնուհետև՝ զորամասի զենքի պահեստապետ, կապավոր, կրակային պատրաստության պետ, հրաձգային դասակի հրամանատար: 3-4 տարի առաջ դարձել է ավագ լեյտենանտ: Նրա ծառայած ընկերը՝ Ստեփան Խաչատրյանը, մեզ հետ զրույցում պատմեց՝ Հայկի կոչումը պետք է բարձրացնեին, բայց ավագ լեյտենանտը եղավ նրա վերջին կոչումը:

«Խստապահանջ էր շատ, բայց միևնույն ժամանակ՝ համեստ ու լուռ: Աշխատասեր էր, չարչարվող: Բոլոր հրամանները կատարում էր անվերապահորեն: Հարմարվող էր շատ, ծառայությանը նվիրված»,- ասաց նա:

Հայկը երկար տարիներ ծառայել է Արցախի Հանրապետության Քարվաճառի շրջանում: Այն ադրբեջանական կողմին անցնելուց հետո ծառայության է անցել արդեն Հայաստանի Գեղարքունիքի մարզում: Մասնակցել է նաև արցախյան 44-օրյա պատերազմին: Ընկերները նրան «Քյավառ» մականվամբ են դիմել, քանի որ Գավառից էր. «Շատ ուժեղ կռիվ էր տալիս, ֆիզիկապես շատ կոփված էր: Դուխով էր ու միշտ պատրաստ պայքարել թշնամու դեմ»,-ասաց Հայկի ծառայակից ընկերը, որը մեր զրույցի պահին էլ գտնվում էր դիրքերում: Մարտերի ժամանակ էլ ինքն ու Հայկը թշնամու դեմ պայքարել են տարբեր հատվածներում:

Հիշեցնենք՝ հուլիսի 28-ին՝ ժամը 03:40-ի սահմաններում, ադրբեջանական ԶՈՒ ստորաբաժանումները հերթական անգամ դիմել են սադրանքի և խախտել հրադադարը հայ-ադրբեջանական սահմանի հյուսիս-արևելյան հատվածում: Ըստ պաշտպանության նախարարության՝ ընթացել են տեղային մարտեր: