Անահիտ Ավանեսյանն ու Տիգրան Ավինյանը պատվաստվեցին «Աստրազենեկա» պատվաստանյութով

Առողջապահության նախարարի պաշտոնակատար Անահիտ Ավանեսյանն ու փոխվարչապետի պաշտոնակատար Տիգրան Ավինյանն այսօր հանրային կերպով պատվաստվեցին «Աստրազենեկա» պատվաստանյութով:

Անահիտ Ավանեսյանը նշեց, որ սեփական օրինակով ուզում են ցույց տալ, որ պատվաստումները կարեւոր կանխարգելիչ միջոցառումներ են, որոնք պետք է օգնեն մեզ հաղթահարել կորոնավիրուսը եւ, ի վերջո, վերադառնալ բնականոն կյանքին: «Շնորհակալություն եմ հայտնում պարոն Ավինյանին, որ նա եւս համաձայնեց հանրային կերպով պատվաստվել»,- ասաց նախարարը:

Տիգրան Ավինյանն էլ նշեց, որ այս տարվա մեր կարեւորագույն գործընթացներից մեկը պատվաստվելն է լինելու: Պատվաստման տեմպերը, ըստ նրա, էականորեն ազդելու են մեր՝ տարբեր երկրներում ներքին կարգավորումների, տուրիզմի, այլ երկրների հետ փոխհարաբերությունների ու երկրի տնտեսական վիճակի վրա: «Մեր քաղաքականությունը պետք է ուղղված լինի նրան, որ հնարավորինս շատ մարդկանց համոզենք ու խրախուսենք մասնակցել կորոնավիրուսի դեմ պատվաստման գործընթացին: Մենք տիկին Ավանեսյանի հետ այսօր պատվաստվեցինք «Աստրազենեկա»-ով եւ հաջորդ չափաբաժինը երեւի թե պետք է ստանանք երկու ամսից»,- ասաց Ավինյանը:

Փոխվարչապետը շեշտեց, որ հատուկ է ընտրվել «Աստրազենեկա» պատվաստանյութը, քանի որ ամենաշատ կեղծ լուրերը հենց այդ պատվաստանյութի վերաբերյալ են տարածվում:

«Որքանով որ ինձ է հայտնի, մոտավորապես 200 միլիոն պատվաստվածներից վատթար հետեւանքներ եղել են ընդամենը մի քանի տասնյակի մոտ»,- ասաց Տիգրան Ավինյանը՝  համեմատություն անցկացնելով, որ եթե կորոնավիրուսով վարակվածներից երկու տոկոսի դեպքում մահ է գրանցվում, ապա ստացվում է՝ նշված 200 միլիոնը եթե չպատվաստվեր, ապա մահերի ցուցանիշը կլիներ մոտ 4 միլիոն մարդ: 

«Այսինքն՝ անհամեմատելի բաների մասին է խոսքը: Միանշանակ կոչ ենք անում պատվաստվել: Դրա համար Հայաստանի Հանրապետությունում ստեղծված են բոլոր հնարավորությունները»,- եզրափակեց Տիգրան Ավինյանը: