Անանուն գերեզմաններ` օկուպացված հայկական տարածքներում․ Բաքուն կոծկում է 44-օրյա պատերազմի զոհերի թիվը

Ադրբեջանի կողմից օկուպացված Ֆիզուլիում՝ Վարանդայում, անհայտ նոր գերեզման է հայտնաբերվել։ Ադրբեջանցի լրագրողները պարզել են, որ դրանք ադրբեջանցի զինվորների գերեզմաններ են, որոնց թաղել են առանց ծնողների իմացության, քանի որ այն լքված է, այցելուներ չի ունենում։ Պատմում են նաև,  որ այն ստեղծվել է 44-օրյա պատերազմի ժամանակ։

Թշնամական երկրի  հայտնի հեռուստաընկերության լրագրողը պատմում է, որ Ֆիզուլիի շրջանի Բալա Բեհմելի գյուղի գերեզմանոցում ադրբեջանցի զինծառայողների լքված 35 գերեզման է հայտնաբերել։ Գերեզմանն անուն չունի, և ոչ ոք չգիտի, թե ովքեր են հուղարկավորված այնտեղ,  զինծառայողների անուններ գերեզմանների վրա գրված չեն, դրանք պարզապես համարակալված են։  Ադրբեջանցի  Մոլլա Սահիբ Շերիֆովը պատմում է, որ վերջին պատերազմի հետևանքով  այդ գերեզմանոցում հուղարկավորված որոշ մարմիններ անճանաչելի են եղել։  Բաքվի իշխանությունները հրաժարվում  են պարզաբանել՝ ովքեր են  հուղարկավորված Վարանդայի այդ հատվածում։

Ադրբեջանցի լրագրողը եզրակացնում է, որ հուղարկավորվածների աճյունները ԴՆԹ փորձաքննության չեն ենթարկվել, և պարզ չէ նրանց ինքնությունը, ինչը թերևս նպատակ ունի թաքցնել 44-օրյա պատերազմում ադրբեջանական կորուստների իրական թիվը։ ԱԻՊԾ տեղեկատվության և հասարակայնության հետ կապերի բաժնի պետ  Հունան Թադևոսյանի կարծիքով նույնպես․

«Որոնողական աշխատանքների ընթացքում դիակների փոխանակում է տեղի ունեցել, գուցե արագ թաղել են հայկական կողմի տված աճյունները՝ առանց ծնողներին տալու, առանց ԴՆԹ հետազոտության»։

Թե քանի նման եղբայրական ու անհայտ գերեզմաններ կան թշնամու երկրում և օկուպացված հայկական տարածքներում, պարզ չէ։ 44-օրյա պատերազմի սկզբին BBC-ի լրագրողը «Պատերազմի գաղտնի զոհերը․ ինչպե՞ս գնահատել ադրբեջանական կորուստները ղարաբաղյան կռվում» վերնագրով հոդվածում  պատմում էր, որ Մինգեչաուր քաղաքի զինվորական գերեզմանոցում պատերազմի հենց սկզբին հայտնաբերվել են ղարաբաղյան պատերազմի ժամանակ զոհված  26 զինծառայողների նոր գերեզմաններ։

Հոդվածագիրը պատմում էր, որ Ադրբեջանը չի հրապարակում զոհերի իրական թիվը, սակայն բազմաթիվ քաղաքներում  նոր գերեզմանների առկայությունը մոտավոր պատկերացում է տալիս Բաքվի կորուստների մասին։ BBC-ի լրագրողը նկատում է նաև՝ գերեզմանների մեծ մասի վրա բացակայում է զինծառայողների մահվան տարեթիվը։