Անվավեր անձնագրերով քաղաքացիների տվյալները չեն լինելու ընտրացուցակներում. Տիգրան Մուկուչյան

Այսօր ԱԺ-ում ԿԸՀ նախագահ Տիգրան Մուկուչյանը, պատասխանելով «Հայաստան» խմբակցության պատգամավոր Գեղամ Նազարյանի՝ ընտրացուցակներում առկա սխալների մասին հարցին, հայտնեց, որ այն անձինք, որոնց անձնագրի վավերականության ժամկետը լրացել է, առաջիկա ՏԻՄ ընտրությունների համար չեն ընդգրկվի ընտրական ցուցակներում: 

«Անվավեր անձնագրերով քաղաքացիների տվյալները չեն լինելու ընտրացուցակներում: Վերջին փոփոխությունների համաձայն, որը կիրառվելու է այս ՏԻՄ ընտրություններում, բոլոր այն քաղաքացիները, որոնց անձնագրի վավերականության ժամկետը լրացել է, չեն ներգրավվի այդ ցուցակներում: Եթե տարբեր հիմքերով ցանկանում ենք սահմանափակել ընտրական ցուցակներում անձանց ընդգրկումը, հետևաբար, պետք է ուղղակիորեն փոխենք ցուցակների կազմման մեթոդաբանությունը: Այսօր սահմանադրական օրենքը սահմանել է որոշակի կարգ, թե ովքեր պետք է մտնեն այդ ցուցակներ, և այդ կարգին համապատասխան էլ՝ ձևավորվում են ընտրական ցուցակները»,- ասաց Մուկուչյանը: