Աշխատողը շարունակելու է ներկայացնել կամ ՊՇՌ բացասական արդյունքը հավաստող փաստաթուղթ, կամ պատվաստման սերտիֆիկատ

Անդրադառնալով նախօրեին ՊՇՌ թեստ հանձնելու Սահմանադարական դատարանի կայացրած որոշմանը և հիմք ընդունելով հանրության շրջանում տարածվող թյուրընկալումը՝ առողջապահության նախարարությունը ևս մեկ անգամ անդրադառնում է թեմային:

Այս մասին տեղեկանում ենք նախարարության ֆեյսբուքյան էջը:

Գերատեսչության իրավաբանական վարչության պետ Աննա Մկրտումյանը հավաստել է, որ Սահմանադրական դատարանի որոշումը առողջապահության նախարարության հաղթանակն է, և, այսպիսով, ՊՇՌ թեստ հանձնելու որոշումը համարվել է սահմանադրական: Քաղաքացիները շարունակելու են գործատուին ներկայացնել կա՛մ ՊՇՌ բացասական արդյունքը հավաստող փաստաթուղթ, կա՛մ պատվաստման սերտիֆիկատ:

Իսկ կորոնավիրուսային հիվանդության («Քովիդ-19») ախտորոշման ՊՇՌ հետազոտության ծառայությունից օգտվելիս դրա դիմաց վճարման պարտականություն ունեցող սուբյեկտների (աշխատողների) շրջանակի սահմանումը, Սահմանադարական դատարանի որոշմամբ, դուրս է առողջապահության նախարարին օրենքով վերապահված լիազորությունների շրջանակից:

Հիշեցնենք, որ երեկ Սահմանադրական դատարանը հրապարակել է «Հայաստանի Հանրապետության բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության և ՀՀ առողջապահության նախարարի 2021 թվականի օգոստոսի 20-ի N 65-Ն հրամանի՝ Սահմանադրությանը համապատասխանության հարցը որոշելու վերաբերյալ» գործով որոշումը։