Ապստամբների դեմ մարտերի ընթացքում ստացած վերքերից մահացել է Չադի նախագահը

Չադի նախագահ Իդրիս Դեբի Իտնոն մահացել է երեքշաբթի ապստամբների դեմ մարտերի ընթացքում ստացած վերքերից: Այդ մասին երեքշաբթի օրը հաղորդել է Agence France Press-ը (AFP)՝ վկայակոչելով Չադի պետական ​​հեռուստատեսությունը:

«Նախագահ ու գերագույն գլխավոր հրամանատար Իդրիս Դեբի Իտնոն հենց նոր կյանքից հեռացավ»,- եթերում ասել է Չադի բանակի պաշտոնական ներկայացուցիչ գնդապետ Ազեմա Բերմանդոան:

Չադում «Փոփոխության և համաձայնության ճակատ» ապստամբ խմբավորման զինված ստորաբաժանումները (FACT) դուրս էին եկել Լիբիայի իրենց բազաներից և Զյարկե շրջանով Չադի ընտրությունների օրը՝ ապրիլի 11-ին, ներխուժել Չադի տարածք: Կառավարության ուժերը, որոնք ներառում են զրահատանկային զորամիավորումներ, ապրիլի 17-ին հանդիպել և ջախջախել են ապստամբների շարասյունները Նջամենայից 300 կիլոմետր հյուսիս: Ավելի քան 300 ապստամբ է սպանվել, ևս 150-ը գերի է ընկել: Պետության ղեկավարը մահացու վիրավորվել է հանգստյան օրերին տեղի ունեցած մարտերի ժամանակ, երբ նա անձամբ էր ղեկավարում ապստամբ զորքերը ոչնչացնելու գործողությունը մայրաքաղաք Նջամենայից հյուսիս ընկած տարածքում:

Երեքշաբթի օրը Չադի անկախ ազգային ընտրական հանձնաժողովը հայտարարել էր, որ կորպուսի գեներալ Իդրիս Դեբի Իտնոն, որը երկիրը ղեկավարում է 1990 թվականից, հաղթել է երկրի ապրիլի 11-ին կայացած նախագահական ընտրություններում՝ վերընտրվելով վեցերորդ ժամկետով: Նա ստացել է ընտրողների ընդհանուր թվի 79,32%-ը:

Նախագահի մահվան կապակցությամբ Չադում երկշաբաթյա համազգային սուգ է հայտարարվել: Ողջ տարածքում սահմանվել է պարետային ժամ`18։00-ից 5։00-ն: