Առաջնագծում ժամկետայինները փոխարինվում են պայմանագրային զինծառայողներով․Նիկոլ Փաշինյան

Առաջնագծում տեղակայվել է 23 նոր մարտական, կրակային դիրք։ Տեղադրվել են 216 ժամանակակից տեսադիտարկման սարքեր, նոր ջերմատեսիլ և ցերեկային համակցված տեսախցիկներ։ Այս մասին այսօրվա ասուլիսի ժամանակ հայտարարեց ՀՀ վարչապետ Նիկոլ Փաշինյանը։

148 մարտական դիրք և հենակետ, ըստ Փաշինյանի, ապահովվել են արդյունաբերական էլեկտրական հոսանքով, մշտական ջրով՝ 235 դիրք։

Վարչապետի փոխանցմամբ՝ Հայաստանում շարունակվել է մարտական հերթապահություն իրականացնող ժամկետային զինծառայողներին պայմանագրայիններով փոխարինելու գործընթացը։ Նա նշեց, որ պայմանագրայինների թիվն ավելացել է 4,1 տոկոսով։

Վարչապետը բացատրեց, որ առաջնագծից հետ են քաշվում ժամկետային զինծառայողները, սակայն դա պետք է անել զգուշորեն, քանի որ կան որոշ նրբություններ։

Նիկոլ Փաշինյանը տեղեկացրեց, որ զորամասերում սննդի ապահովման նոր համակարգի ներդրման համատեքստում 5 կազմակերպություններ արդեն զորամասերի գերակշիռ մեծամասնությունում ներդրել են այդ համակարգը։ Այդ համակարգից օգտվում է ժամկետային զինծառայողների 80 տոկոսը։

Սննդի մատակարարման այդ համակարգը մայիսից կատարվում է նաև դիրքերի 54 տոկոսում։ Ե՛վ դիրքերում, և՛ զորամասերում նոր համակարգը կսկսվի 100 տոկոսով գործել մինչև տարեվերջ։