Արարատ Միրզոյանը դիմել է Մատվիենկոյին 2 հայ գերի կանանց վերադարձի կապակցությամբ

ՀՀ ազգային ժողովի նախագահ Արարատ Միրզոյանը դիմել է Ռուսաստանի Դաշնության Դաշնային խորհրդի նախագահ Վալենտինա Մատվիենկոյին: Այս մասին РИА Новости-ի
հետ ծավալուն հարցազրույցի ժամանակ անդրադառնալով Հայաստանի ներքաղաքական խնդիրներին ու մյուս հարցերին՝ ասել է Մատվիենկոն:

Արարատ Միրզոյանը ռուս գործընկերոջ հետ հեռախոսազրույց է ունեցել, խնդրել վերջինիս միջնորդել Ադրբեջանում գերության մեջ գտնվող 2 հայ կանանց վերադարձի հարցում: Նրանք այժմ, ըստ Մատվիենկոյի, դիտվում են որպես ռազմագերիներ, թեպետ առնչություն չեն ունեցել ռազմական գործողությունների հետ:

«Ես արդեն հեռախոսազրույց եմ ունեցել Ադրբեջանի խորհրդարանի նախագահ Սահիբա Գաֆարովայի հետ՝ դիմելով նրան հիշյալ 2 կանանց վերադարձի հնարավորությունը դիտարկելու հարցով։ Երբ խոսքը վերաբերում է կանանց, դա չափազանց զգայուն է, սաստիկ մտահոգիչ: Հուսով եմ, որ ադրբեջանական կողմը կարձագանքի այդ խնդրանքին»,- ասել է Մատվիենկոն: