Արտասահմանցիներն այսուհետ չեն կարողանա պատվաստվել պոլիկլինիկաներում

Հուլիսի 15-ից սկսած՝ Հայաստանում ուժի մեջ կմտնի պահանջ, ըստ որի՝ Հայաստան ժամանած զբոսաշրջիկների դեպքում, որոնք Հայաստանում կբնակվեն առնվազն 10 օր, կիրականացվի պատվաստում: Այս մասին այսօր Կառավարության նիստից հետո լրագրողներին հայտնեց ՀՀ առողջապահության նախարարի պաշտոնակատար Անահիտ Ավանեսյանը։

«Հուլիսի 15-ից ուժի մեջ կմտնի նախարարի հրամանը, որ Հայաստանում միայն առնվազն 10 օր բնակվելու դեպքում կիրականացվի պատվաստումը»,- ասաց նա։

Այս փոփոխությունը միակ կարգավորումը չէ, որ առողջապահության նախարարությունն իրականացրել է արտասահմանցիների պատվաստման կարգի մեջ։ Առողջապահության նախարարի պաշտոնակատարն այսօր Կառավարության նիստում հայտնեց, որ արտասահմանցիներն այսուհետ չեն կարողանա պատվաստվել պոլիկլինիկաներում։ Ավանեսյանը նշեց, որ շատ է այն արտասահմանցիների թիվը, որոնք գալիս և պատրաստվում են ՀՀ-ում, և հերթեր չգոյացնելու համար իրենք նոր կարգ են մշակել:

«Նոր որոշում է կայացվել, որ այսուհետ պոլիկլինիկաներում կպատվաստվեն միայն ՀՀ քաղաքացիները, իսկ արտասահմանցիների պատվաստումները կիրականացնեն միայն շրջիկ կետերում»,- տեղեկացրեց նախարարի պաշտոնակատարը: