Արցախը բժիշկների կարիք ունի

«Հայկական ժամանակը» գրում է․Արցախյան 44-օրյա պատերազմից հետո Արցախի Հանրապետության Ստեփանակերտի հանրապետական հիվանդանոցում բժիշկների կարիքը նորից գլխավոր խնդիրներից մեկն է: Պատերազմի ավարտից հետո հիվանդանոցի մոտավորապես 15 մասնագետներ հեռացել են Արցախից և բնակություն հաստատել Հայաստանում: Նրանցից ոմանք մտադրված են արտերկիր մեկնել՝ մշտական բնակության համար:

Արցախի առողջապահության նախարարության ընդհանուր բաժնի վարիչ Մերի Զաքարյանի խոսքով՝ սա Արցախի համար մեծ թիվ է կազմում: Հիվանդանոցը հիմա բժիշկների կադրային խնդիր ունի:

«Պատերազմի ավարտից հետ ունենք աշխատանքից ազատված բժիշկներ, որոնք դժվար հետ վերադառնան: Բժիշկներ կան, որ պայմանագրային բժիշկներ են եղել, այսինքն՝ եկել էին Արցախ՝ հստակ ժամանակահատվածում աշխատելու համար, բայց հիմա մտադրություն ունեն արտերկիր մեկնել: Պատերազմի ժամանակ այն բժիշկները, որոնց կարիքը խիստ ունեինք, կային, չնայած կային նաև բժիշկներ, որոնք պատերազմի ժամանակ դուրս եկան Արցախից, բայց մենք այնպիսի օգնություն ենք ստացել Հայաստանից և արտերկրից, որ բժշկի պակաս չենք զգացել»,- մեզ հետ զրույցում ասաց նա: