Արցախի դեմ կռվում է ոչ միայն Ադրբեջանը, այլև Թուրքիան․ ԱՀ նախագահ

Պատերազմին սպասելու համար մեզ շատ բան պետք չէր, ընդամենը պետք էր հետեւել Ադրբեջանի եւ Թուրքիայի ղեկավարների վերջին ամիսների հայտարարություններին։ Մեզ համար պարզ է եղել, պատերազմի մենք սպասում էինք։

Այս մասին քիչ առաջ մամուլի ասուլիսի ժամանակ ասաց Արցախի Հանրապետության նախագահ Արայիկ Հարությունյանը։ Նա շեշտեց, որ իրենց համար օրը պարզ չէր, բայց եւ Պաշտպանության Բանակը առավոտյան 07։00-ին հիմնականում պատրաստ էր պատերազմի։

Հարձակումը սկսվել է 07։00-ի մոտակայքում ամբողջ երկայնքով՝ Օմարից մինչեւ Արաքս։ Ներկայացնելով արդյունքները, Հարությունյանը հայտնեց, որ ունենք կորցրած դիրքեր, հիմնականում Թալիշի ուղղությամբ եւ Հարավային թեւում։ Նա ասաց նաեւ, որ ունենք տասնյակ զոհեր եւ ցավակցեց բոլոր հայրենակիցներին։ Ունենք տասնյակ վիրավորներ՝ նաեւ քաղաքացիական բնակչության շրջանում։ Բնակչության շրջանում ունեցել ենք նաեւ զոհեր, առաջին զոհերից են Մարտունիում բնակվող տատիկն ու իր թոռնիկը։

«Կարծես թե ձեռագիրը նույնն է, ինչպես Ապրիլյանի ժամանակ, սակայն մասշտաբներն անհամեմատելի են։  Բայց ուզում եմ հայտարարել, որ մեզ հետ կռվում է ոչ թե Ադրբեջանը, այլ նաեւ՝ Թուրքիան։ Օգտագործում են թուրքական բանակի ձեռքի տակ եղած ժամանակակից զենքերն ու զինամթերքները։ Այն նույն F-16-ները (խոսքը թուրքական ինքնաթիռի մասին է), որոնք ամսից ավելի է գտնվում են Ադրբեջանի տարածքում, սովորական կամ համատեղ զորավարժության անվան տակ օգտագործում են առավոտից մինչ այս պահը»,- ասաց Արցախի նախագահը՝ հայտնելով, որ սա պետք է լինի հստակ հայտարարություն համայն աշխարհին։

Նա եւս մեկ անգամ շեշտեց, որ Արցախի դեմ կռվում է նաեւ Թուրքիան, իսկ Արցախը կռվում է օգտագործելով միայն իր ՊԲ-ի ուժերը, կլինեն նաեւ կամավորներ ՀՀ-ից։

Հարությունյանը վստահեցրեց, որ Արցախի ՊԲ-ն պատվով կատարում է իր առջեւ դրված խնդիրը։ Իհարկե, դիրք ենք կորցրել, հնարավոր է, որ էլի կորցնենք, բայց եւ գրավելու ենք հաստատ։ «Պատերազմի արդյունքները կոնկրետ մեզ համար կանխատեսելի են։ Այն ծրագիրը, որն ունի թշնամին, ձախողվելու են։ Ունեն կորուստներ տասնյակ տեխնիկայի, անօդաչու սարքերի, ուղղաթիռների»,- ասաց նախագահը։