Աֆրիկացի երեխաները Հայաստանում ենթարկվել են ոսկրածուծի փոխպատվաստման

Հայաստանում առաջին անգամ իրականացվել է ոսկրածուծի ալոգեն փոխպատվաստումը։ Առողջապահության ենթակայության տակ գործող Յոլյանի անվան արյունաբանական կենտրոնում հայ բժիշկները ոսկրածուծի փոխպատվաստումն իրականացրել են աֆրիկացի երկու երեխաների դեպքում։ Փոխպատվաստումը Հայաստանում հասանելի դարձնելը ֆինանսավորել են մի շարք միջազգային հիմնադրամներ՝ «Սիթուս» հիմնադրամը՝ առողջապահության նախարարության միջոցով, «Ժպիտների քաղաք» հիմնադրամը:

«Ոսկրածուծի պատվաստումը մեր գերագույն նպատակներից մեկն է, մեր տասնամյակների երազանքն է, չափազանց կարևոր նշանակություն ունի մեր երկրի առողջական բնագավառի համար, որ բնորոշի մեր առողջապահական մակարդակը։ Նրանցից առաջինը վիրահատվել է հուլիսի 7-ին, երկրորդը՝ հուլիսի 13-ին։ Երկուսն էլ այժմ իրենց լավ են զգում: Վիրահատությունից հետո և ընթացքում որևէ բարդություն չի եղել»,- այսօր լրագրողների հետ զրույցում ասաց ԱՆ Յոլյանի անվան արյունաբանական կենտրոնի տնօրեն Սուրեն Դանիելյանը։

Փոխպատվաստման ենթարկված երեխաներից մեկը 5 տարեկան է, Աֆրիկյան Հանրապետության Նիգերիա քաղաքից, մյուսը՝ 1․8 տարեկան՝ Քամերոն քաղաքից։ Նրանց փոխպատվաստման համար դոնոր են հանդիսացել իրենց քույրերն ու եղբայրները։ Առաջին երեխայի դոնորը նրա զույգ քույրն է եղել, երկրորդինը՝ 12 տարեկան եղբայրը։

Ոսկրածուծի փոխպատվաստումն առաջին անգամ Հայաստանում իրականացնելիս հայ բժիշկներին աջակցել է նաև իտալացի բժիշկ Լորենս Ֆոլկները, որը ոսկրածուծի փոխպատվաստման տրասպատ կենտրոնների կայացման օժանդակող է, այդ թվում՝ Հայաստանում։ Ոսկրածուծի բաժանմունքի ղեկավար Կարեն Մելիքսեթյանի խոսքով՝  փոխպատվաստումն իրականացվել է մանգաղաձև բջջային անեմիա հիվանդության պարագայում, որը Հայաստանում չի հանդիպում, քանի որ մեր գենետիկայում այդ հիվանդությունը չկա․ «Երեխաները 18 օր ստացել են դեղամիջոց, որից հետո իրականացվել է պատվաստումը, այսինքն՝ դոնորից վերցնում են ոսկրածուծի ցողունային բջիջը, ներարկում հիվանդին։ Այս հիվանդությամբ հայ երեխաները չեն հիվանդանում, այն շատ հաճախ հանդիպում է Հնդկաստանում, Աֆրիկայում»,- ասուլիսի ընթացքում ասաց բժիշկը։

Նրա խոսքով՝ հայ մանուկների մոտ հանդիպող հիվանդությունները լինում են արյան չարորակ և ոչ չարորակ ժառանգական հիվանդությունները, օրինակ՝ թալասեմիան, որը ենթադրում է անընդհատ արյան փոխպատվաստում, պլաստիկ սակավարյունությունը և չարորակ սուր ներյոպլաստիկ լեյկեմիան։

Ոսկրածուծի փոխպատվաստման ծրագիրը Հայաստանում պիլոտային բնույթ է կրում։ Բացի երկու երեխաներից, փոխպատվաստման պետք է ենթարկվեն դեռ 10 երեխաներ։ Մասնագետների խոսքով՝ ոսկրածուծի փոխպատվաստումը, որը իրականացվեց մանգաղաձև բջջային անեմիայի պարագայում, հնարավորություն կտա, որ հետագայում փոխպատվաստում հնարավոր լինի իրականացնել չարորակ հիվանդությունների դեպքում։

Առողջապահության նախարարի տեղակալ Գևորգ Սիմոնյանի կարծիքով՝ ոսկրածուծի փոխպատվաստումը հնարավորություն կտա լուծել միանգամից երկու հարց՝ այն մարդիկ, ովքեր կունենան նման խնդիր, այլևս կարիք չեն ունենա մեկնել արտերկիր, իսկ մյուսով լուծվում է նաև բժշկական տուրիզմի հարցը։ «Բժշկագիտության տեսակետից սա մեծ քայլի սկիզբ է»,- ասաց նա։