Բեյրութում պայթյունի հետևանքով մահացած հայերի թիվն այս պահի դրությամբ վեցն է. ԱԳՆ

Բեյրութ, Լիբանան պայթյուն

Բեյրութում տեղի ունեցած պայթյունի հետևանքով հայազգի մահացածների թիվն այս պահի դրությամբ վեցն է, հայտնում է Հայաստանի արտգործնախարարության մամուլի խոսնակ Աննա Նաղդալյանը:

Նաղդալյանը հայտնում է, որ ԱԳՆ-ում ձևավորվել է աշխատանքային խումբ՝ Լիբանանին թիրախային աջակցության տրամադրումն Լիբանանի ճգնաժամային կառույցի հետ համակարգելու նպատակով։ Լիբանանում ՀՀ դեսպանությունը մշտական կապի մեջ է տեղի պատկան մարմինների հետ՝ միասնաբար գնահատելու լիբանանյան կողմի կարիքները և աջակցության շրջանակը։

«Զուգահեռաբար կապ է պահպանվում հայ համայնքային կառույցների հետ՝ կարիքները գնահատելու նպատակով։ Լիբանանում դեսպանությունն աշխատում է արտակարգ ռեժիմով, գործում է թեժ գիծ», – Ֆեյսբուքում գրել է ԱԳՆ խոսնակը։