«Տեսարան դեպի Բուսաբանական այգի»,-այսպես են կառուցապատողները ծառերի փոխարեն «աճող» բարձրահարկ շենքերում բնակարաններ գնելու առաջարկն անում քաղաքացիներին։
Իսկ, թե ասֆալտից բացի՝ ի՞նչ են տեսնելու գնորդները, արդյո՞ք ամեն առավոտ նրանք ականատես կլինեն տարատեսակ ծառերի մեղմ զրույցին, թե ուղիղ կնայեն հերթական շենքին ու հարևանի պատուհանին, սա դեռ հարց է։
Տեղի բնակիչների փոխանցմամբ՝ տարիներ առաջ շինհրապարակ դարձած տարածքում եղել է խիտ բուսականություն, իսկ հիմա միայն բետոն է։
Այստեղ գնահատանքի արժանի միակ լավ գործն այն է, որ Երևանի բուսաբանական այգու շուրջ 50 հա-ն Արցախյան ազատամարտերում զոհված հերոսների հիշատակին նվիրված «Կյանքի պուրակ» կդառնա: Պուրակը կունենա արհեստական լճակ, կվերանորոգվեն կասկադային աստիճանահարթակները, կկառուցվի ճեմուղի ու հեծանվուղի: Երևանի քաղաքապետարանի փոխանցմամբ՝ «Կյանքի պուրակ»-ը կյանքի կոչելու համար պետական բյուջեից 4.6 մլրդ դրամ է հատկացվել։