Գազալցակայաններում իրավունք չեն ունենա լիցքավորել Էլեկտրոնային շտեմարանում չգրանցված մեքենաներին. որքան է տուգանքի չափը

Կառավարությունը գազաբալոնային ավտոմեքենաների շահագործման անվտանգության մակարդակը բարձրացնելու նպատակով առաջարկում է հստակեցնել գազաբալոնների տեղադրմանը, վկայագրմանը, դրանք կատարող կազմակերպություններին, արտադրական բազաներին և ինժեներաբանվորական անձնակազմերին ներկայացվող պահանջները:

Հայաստանում բոլոր մեքենաների գազաբալոնների հետ կապված տվյալները լիցենզավորված կազմակերպությունները պետք է մուտքագրեն մեկ միասնական էլեկտրոնային շտեմարան: Այս մասին այսօր «Արմենպրեսի» սրահում կազմակերպված մամուլի ասուլիսի ժամանակ հայտարարեց ՀՀ ՏԿԵ նախարարության Ավտոմոբիլային տրանսպորտի քաղաքականության, լիցենզավորման և թույլտվությունների վարչության բաժնի պետ Արայիկ Ստեփանյանը:

Ստեփանյանը մանրամասնեց՝ նախագիծն սահմանում է, որ ավտոմեքենաներում տեղադրված յուրաքանչյուր գազաբալոն պետք է ունենա փական, որը կապահովի դրանք անջատելը գազավառելիքային սնման համակարգից: Իսկ շահագործվող գազաբալոնները ենթակա են պարտադիր վկայագրման։ «Պարբերական վկայագրումը կատարվելու է հետևյալ պարբերականությամբ՝ լեգիրացված պողպատից պատրաստված 1-ին տիպի գազաբալոնները՝ երեք տարին մեկ անգամ, եթե առկա է արտադրողի՝ պողպատի լեգիրացված լինելը հավաստող փաստաթուղթ, հակառակ դեպքում՝ երկու տարին մեկ անգամ»,- մասնավորեցրեց նախագծով առաջարկվող պայմանները:

Օրենսդրական նոր փոփոխություններով նախատեսվում է նաեւ ստեղծել ՀՀ-ում ավտոմոբիլների վրա տեղադրված գազաբալոնային համակարգերի բալոնների վերաբերյալ էլեկտրոնային շտեմարան: Շտեմարաններում ներառվելու են բոլոր գազաբալոնների վերաբերյալ տվյալները՝ տրանսպորտային միջոցների համարանիշերը, նույնականացման համարները, տեղադրված գազաբալոնի համարն ու հերթական վկայագրման ժամկետները:

«Շտեմարանի ձեւավորումը բավականին բարդ պրոցես կլինի: Մուտքի թույլտվություն է տրվելու մեր նախարարության կողմից՝ համապատասխան դիմումի հիման վրա: Բացի գազաբալոնների տեղադրման եւ պարտադիր վկայագրման կարգից՝ մենք նաեւ մշակել ենք լիցենզավորման կարգը, սահմանվել են լիցենզավորման պարտադիր պայմաններ եւ պահանջներ»,- ասաց նա:

Ըստ Ստեփանյանի՝ շտեմարանի ձեւավորումը բավականին բարդ պրոցես կլինի: Սակայն այս քայլով հասնելու են մի շատ կարեւոր կետի՝ պիտանելիության ժամկետները ավարտած բոլոր գազաբալոնները դուրս են գալու շրջանառությունից, այսինքն՝ բոլոր այն գազաբալոնները, որոնք վտանգ են ներկայացնում անվտանգության համար, դուրս են բերվելու:

Հարցին՝ լցակայանների տնօրենների նկատմամբ ի՞նչ պատժաչափ է նախատեսված կամ ի՞նչ միջոցներ են կիրառվելու, եթե վերոնշյալ պահանջները չպահպանվեն, Ստեփանյանն ասաց. «Եթե առանց լիցենզիայի գործունեություն կծավալի որեւէ կազմակերպություն, նախ՝ հնարավորություն չի ունենա իր կատարած գործողության տվյալները մուտքագրել  էլեկտրոնային շտեմարան, որովհետեւ այդ հնարավորությունները կունենան միայն լիցենզավորված կազմակերպությունները: Երբ արդեն շտեմարանը ձեւավորվի, առանց դրա համադրման գազալցակայանում տվյալ բալոնի լիցքավորում չպետք է իրականացվի»:

Այս օրենքի խախտման համար վարչական պատասխանատվություն է սահմանվում նաեւ գազալցակայանների պաշտոնատար անձանց նկատմամբ՝ տուգանք՝ նվազագույն աշխատավարձի երկուհարյուրապատիկից երեքհարյուրապատիկի չափով:

Մասնագետի փոխանցմամբ՝ ավտոմոբիլների վրա տեղադրվող գազաբալոնային համակարգի վկայագրման համար ժամկետները չեն փոխվել, դրանք նույնն են նաեւ գործող օրենսդրությամբ. փոփոխման պարբերականությունը սահմանված է երկու տարին մեկ անգամ: Մեքենայի վրա գազաբալոնային համակարգ է տեղադրվում մեկ անգամ, դրանից հետո սահմանված պարբերականությամբ տեղադրված գազաբալոնը վկայագրվում է, այսինքն՝ ստուգվում է նրա պիտանելիությունն օգտագործման համար, ստուգվում է նաեւ սնման համակարգը: Վերոնշյալ գործողությունները կատարելու համար մեքենայի սեփականատիրոջը տրվում է սահմանված պետական ձեւանմուշի փաստաթուղթ:

«Էլեկտրոնային շտեմարանի ձեւավորումից հետո դեպի շտեմարան մուտք կապահովվի բոլոր գազալցակայաններին: Լիցքավորելուց առաջ մեքենայի համարը հավաքելով՝ նրանք պետք է անմիջապես շտեմարանից նույնականացնեն տվյալ մեքենայի գազաբալոնի վերաբերյալ տվյալները: Եթե դա օրենքով սահմանված կարգով վկայագրված եւ ժամկետը պահպանված է, լիցքավորել, եթե ոչ՝ ոչ»,- մանրամասնեց Ստեփանյանը: