Գիտության զարգացումը՝ կառավարության առաջնահերթությունների թվում. ՀՀ-ն կմասնակցի «Հորիզոն Եվրոպա» ծրագրին

Կառավարությունը հավանություն տվեց «Հայաստանի Հանրապետության և Եվրոպական միության միջև «Հորիզոն Եվրոպա» հետազոտությունների և նորարարության շրջանակային ծրագրին ՀՀ մասնակցության մասին» համաձայնագրի ստորագրման առաջարկությանը: Համաձայնագրի նախագծի շուրջ բանակցությունները մեկնարկել են 2021 թվականի հունիսի 25-ից և ավարտվել են սեպտեմբերի 16-ին: Բանակցությունների արդյունքում համաձայնեցվել է համաձայնագրի վերջնական տեքստը` հաշվի առնելով ՀՀ շահագրգիռ գերատեսչություններից ստացված առաջարկությունները և դիտողությունները և բանավոր պայմանավորվածություն է ձեռք բերվել սկսելու համաձայնագրի նախագծի ստորագրման համար Հայաստանի Հանրապետության և Եվրոպական միության օրենսդրությամբ նախատեսված ընթացակարգերի ապահովման աշխատանքները:

Ինչպես նշեց ՀՀ կրթության, գիտության, մշակույթի և սպորտի նախարար Վահրամ Դումանյանը, «Հորիզոն Եվրոպա» հետազոտությունների և նորարարության շրջանակային ծրագրին ՀՀ-ի մասնակցությունը հնարավորություն է ընձեռելու գիտնականներին, խմբերին անմիջական մասնակիցը դառնալու համաշխարհային մակարդակի և նշանակության հետազոտություններին: «Միաժամանակ, ՀՀ գիտնականներին հնարավորություն կտրվի օգտվելու ծրագրի մասնակից պետությունների առաջադեմ ենթակառուցվածքներից: Ծրագրով նաև հնարավորություններ են նախատեսվում բարձր տեխնոլոգիական ոլորտի ստարտափերի և փոքր ու միջին ձեռնարկությունների աջակցության համար: Ծրագրին մասնակցությունը կապահովի Հայաստանի Հանրապետության գիտական համակարգի եվրոպական հետազոտական տարածքին ինտեգրվելու գործընթացին շարունակականությունը»,-ասաց նախարարը:

Վահրամ Դումանյանը տեղեկացրեց, որ անդամակցության ամենամյա վճարը կկատարվի ՀՀ պետբյուջեից՝ գիտության ոլորտին հատկացվող միջոցների հաշվին: «Ծրագիրը գործելու է մինչև 2027 թվականը: Մեր գիտնականների հետազոտական թեմաները կֆինանսավորվեն Եվրամիության կողմից, որոնք շոշափելի գումարներ են: Եվ կախված մեր գիտական ակտիվությունից, գիտնականների ներկայացրած ծրագրերի որակներից՝ անդամակցության վճարն էլ կարող է վերանայվել և նվազեցվել: Այսպիսով՝ այն գիտական աշխատանքների և ծրագրերի իրականացման լավագույն և կարևոր հարթակ է մեր գիտնականների համար»:

Վարչապետ Նիկոլ Փաշինյանը կարևորեց ընդունված որոշումը և նշեց, որ գիտության զարգացումը եղել և շարունակում է մնալ կառավարության առաջնահերթությունների ցանկում: «Ուզում եմ հիշեցնել, որ 2022թ. ՀՀ պետբյուջեի նախագծով գիտությանը հատկացվող ֆինանսավորումը նախատեսվում է ավելացնել 83 տոկոսով: Գիտական թեմատիկ հետազոտություններին հատկացվող գումարն էլ ավելանալու է ավելի քան 2,5 անգամ՝ կազմելով շուրջ 6,7 մլրդ դրամ: 2019 և 2020 թվականներին իրականացրել ենք գիտական սարքավորումների աննախադեպ ծավալով ձեռքբերումներ»,- ասաց վարչապետը: