Գրիպով վարակված 13 անձ վերակենդանցման բաժանմունքում է. վիրուսի տարածվածությունը բարձր է Արարատի մարզում

Գրիպով և սուր շնչառական հիվանդության վարակվածությունն առավել բարձր է դիտվում Արարատի և Տավուշի մարզում, Երևանում և մնացած մարզերում վարակվածության ցուցանիշը միջին ակտիվության է:

Հայաստանում շրջանառվում է գրիպի Ա տեսակի H3 ենթատեսակի վարակիչ վիրուսը:

Այս մասին այսօր հրավիրված ասուլիսի ժամանակ ասաց ՀՀ ԱՆ հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը՝ ամփոփելով հանրապետությունում սուր շնչառական հիվանդություններով ու գրիպով պայմանավորված իրավիճակը:

Աբովյանի խոսքով՝ 2021 թվականին գրիպով և սուր շնչառական հիվանդության վարակվածությունը գրիպի սեզոնի 53 շաբաթականում նվազել է 1.4 անգամ, բայց Հայաստանում ունենք այդ հիվանդությամբ վարակվածության 2 անգամ բարձր շեմ: Նախորդ տարվա համեմատ այն բարձր է 1.8 անգամ

«Հունվարի 4-ի տվյալներով՝ ԲԿ-ներում հոսպիտալացված է 590 պացիենտ, որոնցից 90  տոկոսից ավելին 0-18 տարեկան երեխաներն են: 13 հիվանդ վերակենդանացման բաժանմունքում է գտնվում, որոնց մեծ մասը 0-5 տարեկան երեխաներն են»,- ասաց նա:

Մասնագետը պարզաբանեց՝ բարձր շեմը ենթադրում է համաճարակաբանական ցուցանիշը: Յուրաքանչյուր երկիր հաշվում է այդ հիվանդության շեմը իր երկրում, և մեր երկրում այդ ցուցանիշով բավականին լարված իրավիճակ է:

«ՀՀ առողջապահության նախարարության մանկբուժության գծով խորհրդատու Սերգեյ Սարգսյանն էլ հավելեց՝ հիվանդանոցներ դիմելիության ցուցանիշը նույնպես աճել է, ինչն էլ պայմանավորված է ամանորյա այցերի հետ: Մինչև Նոր տարի դրական ազդեցություն կար հիվանդության թվերի իջեցման վրա: Հիմա գրանցվում են այն դեպքերը, որոնք վարակվել են Նոր տարվա այցելությունների ժամանակ: Հոսպիտալացվածներից ամենաերիտասարդը 44 օրական երեխան է, որի վարակվածության դեպքն այցելությունների հետևանքն է»,- ասաց նա:

Մանկաբույժի խոսքով՝ հիվանդացությունն ի սկզբանե ախտահարում է երեխաներին: Հիմա գրանցվում են բարձր ջերմություն, ականջի բորբոքում, թոքաբորբի դեպքեր և, ինչպես մնացած դեպքերում, հիվանդությունն ախտահարում է այլ խնդիրներից առավել տուժած երեխաներին: