Դատախազությունը դիմել է դատարան` բռնագանձելու Վլադիմիր Գասպարյանի և նրա ընտանիքի գույքը

Գլխավոր դատախազությունը դիմել է դատարան՝ Հայաստանի նախկին ոստիկանապետ Վլադիմիր Գասպարյանի ու նրա ընտանիքի անդամների ապօրինի ծագում ունեցող գույքի բռնագանձման պահանջով։ Տեղեկանում ենք դատական տեղեկատվական հարթակից։Գործով պատասխանողներն են Վլադիմիր Գասպարյանը, նրա կինը՝ Սուսաննա Գասպարյանը, մայրը՝ Անժելա Գասպարյանը, որդին` Վլադիմիրը, դուստրը` Անգելինան և զոքանչը` Հեղուշ Գալստյանը։ Նշենք, որ նման հայցադիմում դատախազությունը ներկայացրել է նոյեմբերի 18-ին, սակայն այնտեղ թույլ տրված խախտումների պատճառով հայցադիմումը հետ է վերադարձվել։ Դեկտեմբերի 2-ին այն նորից դատարան է ներկայացվել։

Հունիսի 30-ին հայտնի դարձավ, որ «Ապօրինի ծագում ունեցող գույքի բռնագանձման մասին» օրենքի շրջանակներում իրականացվող ուսումնասիրության արդյունքում Գասպարյանի գույքի վրա արգելանք է դրվել։ Դրանից հետո Վլադիմիր Գասպարյանին արգելվել էր տնօրինել Գեղարքունիքի մարզի Աղբերք համայնքի 0.2 հեկտար մակերեսով հողամասը, Երևանի Թումանյան 39 շենքի 9-րդ բնակարանը, Mercedes-Benz S450 4Matic և IZH 2715 մակնիշի ավտոմեքենաները (տեղեկությունը հրապարակվել էր «Ազդարար»-ում):