Ես մեղավոր չեմ. Սերժ Սարգսյանը չընդունեց իրեն վերագրվող մեղադրանքը

Երևան քաղաքի ընդհանուր իրավասության դատարանի Ավանի և Նոր Նորք նստավայրում՝ դատավոր Վահե Միսակյանի նախագահությամբ, այսօր Սերժ Սարգսյանի, «Ֆլեշ» ընկերության սեփականատեր Բարսեղ Բեգլարյանի և Գևորգ Հարությունյանի գործով մեղադրող դատախազ Արսեն Մարտիրոսյանը հրապարակեց մեղադրական եզրակացության եզրափակիչ մասը։

Հրապարակումից հետո դատավորը Սերժ Սարգսյանին հարցրեց՝ ինքն առաջադրված մեղադրանքն ընդունո՞ւմ է, թե՞ ոչ, ինչին ի պատասխան՝ Սարգսյանն ասաց.

«Ես լսեցի մեղադրողի ընթերցածը, այն շարադրված է գործից անտեղյակ մարդկանց կողմից, մեղադրանքն ամբողջովին կեղծ է, մոգոնվել է Հատուկ քննչական ծառայության կողմից և հաստատվել է դատախազության կողմից քաղաքական պատվերի շրջանակում»,- նշեց նա։

Դատավորի հարցին՝ կարո՞ղ են արձանագրել, որ նա իրեն մեղավոր չի ճանաչում, Սերժ Սարգսյանն ասաց. «Ես մեղավոր չեմ»:

Բարսեղ Բեգլարյանը և գյուղնախարարության նախկին պաշտոնյա Գևորգ Հարությունյանը նույնպես չընդունեցին իրենց վերագրվող մեղադրանքները։

«Ոչ մեկի չեմ դրդել, և ընդհանրապես անիմաստ է հափշտակում համարել այդ գումարը, որը տրամադրվել է «Ֆլեշ» ընկերությանը»,- ասաց Բարսեղ Բեգլարյանը։

Գևորգ Հարությունյանն էլ նշեց, որ մեղադրանքն ամբողջովին անհիմն է:

Այնուհետեւ դատարանը սահմանեց ապացույցների հետազոտման կարգը, ըստ այդմ՝ կհետազոտվեն գործում առկա նյութերը, հետո կհարցաքննվեն վկաները, ինչից հետո էլ՝ ամբաստանյալները:

Հաջորդ դատական նիստը տեղի կունենա օգոստոսի 5-ին՝ ժամը 14:30-ին:

Ըստ մեղադրական եզրակացության՝ Սերժ Սարգսյանի կազմակերպմամբ եւ Բարսեղ Բեգլարյանի դրդմամբ, Սամվել Գալստյանի ու Գեւորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընդգրկված ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամ: