Էդմոն Մարուքյանն անդրադարձել է ՌԴ-ում հայկական համարանիշերով մեքենաների տերերին տուգանելու հարցին

ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանը հայտնել է, որ Ռուսաստանի Դաշնությունում հայկական պետհամարանիշերով մեքենաների սեփականատերերից ոստիկանության աշխատակիցները մաքսային փաստաթղթեր են պահանջում,-այս մասին «Ֆեյսբուքի» իր էջում գրել է Էդմոն Մարուքյանը:

«Իմ կարծիքով, սա հակասում է ԵԱՏՄ ընթացակարգերին: Տեղեկացնում եմ, որ երեկ այս հարցով խոսել եմ ՀՀ փոխվարչապետ Մհեր Գրիգորյանի հետ, ով զբաղվում է նշված խնդրով: Հուսով եմ` խնդիրն արագ կկարգավորվի»,- նշել է Մարուքյանը:

Նա հավելել է, որ ՀՀ փոխվարչապետ Մհեր Գրիգորյանի՝ խնդրի կարգավորման վերաբերյալ գրավոր պատասխանը ստանալուն պես կհրապարակի իր էջում:

Օրեր առաջ ևս պատգամավորն անդրադարձել էր խնդրին և հայտնել, որ հայկական պետհամարանիշերով մեքենաների սեփականատերերը տուգանվում են, մեքենաներն անգամ շենքերի բակերից և փողոցներից տարվում են տուգանային հրապարակ: