Թմրանյութ տեղափոխող կատվին ձերբակալել են

Պանամայում «ձերբակալել են» մի կատվի, որը փորձում էր կոկաինի և մարիխուանայի փաթեթներ մտցնել Կոլոն քաղաքի «Նուեվա Էսպերանսա» բանտ:  Թմրանյութերը ամրացված են եղել կենդանու վզին,-հաղորդում է Panamá América պարբերականը: Կատվին բռնել են բանտի պահակները, երբ կենդանին փորձում էր մտնել հրդեհային մուտքի ճաղավանդակներից ներս:

Քաղաքի գլխավոր դատախազի հավաստիացմամբ՝ դատապարտյալները կենդանիներին գրավում են սննդով: Կենդանիները սովորում են, որ իրենց  բանտում «լավ են նայում» և սկսում են միշտ գալ՝ միաժամանակ նաև առաքիչների դեր ստանձնելով:

«Նուեվա Էսպերանսա» բանտում դա առաջին դեպքը չէ: Մեկ անգամ էլ բռնել էին թմրանյութ բերող աղավնու: Դատախազը համագործակցում է կենդանիների պաշտպանության կոմիտեի հետ: Բոլոր փամփլիկ «հանցագործներին» տեղափոխում են կենդանիների ապաստարաններ, որտեղ նրանք կյանքը սկսում են նոր, մաքուր էջից՝ առանց օրինախախտումների: