Թուրքիան պաշտոնապես հեռացվեց ամերիկյան F-35 կործանիչների արտադրության ծրագրից

Պենտագոնը Անկարային ծանուցել է ամերիկյան F-35 նոր սերնդի կործանիչների արտադրության ծրագրից Թուրքիային պաշտոնապես հեռացնելու մասին:

ԱՄՆ պաշտպանության նախարարության անանուն պաշտոնյան թուրքական պետական «Anadolu» լրատվական գործակալությանը հայտնել է, որ 2007թ. հունվարի 26-ին Թուրքիայի ստորագրած փոխըմբռնման համատեղ հուշագիրը խզվել է, և նոր համաձայնագրում Թուրքիան չի ընդգրկվել: Միաժամանակ, նշվում է, որ ծրագրում նոր գործընկեր երկիր չի ավելացել:

Հիշեցնենք, որ 5-րդ սերնդի գերժամանակակից F-35 կործանիչների արտադրության նախագծին մասնակցում էր ՆԱՏՕ-ի անդամ մեկ տասնյակ երկիր, այդ թվում՝ Թուրքիան: Սակայն Ռուսաստանից S-400 բարձր հեռահարության հակաօդային պաշտպանության համակարգեր գնելու պատճառով 2020թ. հուլիսին Վաշինգտոնի նախաձեռնությամբ կասեցվեց Թուրքիայի մասնակցությունը կործանիչների արտադրության ծրագրին, դադարեցվեց նաև Անկարային երկրի համար արդեն արտադրված կործանիչների մատակարարումը: