«Ժխտողականության հարցում Թուրքիայի ներկա իշխանությունը նախկինից ավելի վատն է». թուրք քաղաքագետ

Թուրք քաղաքագետ, լրագրող և հրապարակախոս Ջենգիզ Աքթարը Ermenihaber-ին տված հարցազրույցում նշել է, որ ժխտողականության հարցում Անկարայի այսօրվա ռեժիմը նախկինից ավելի վատն է: «Ցեղասպանության ճանաչումը ԵՄ գործընթացի շրջանակում գուցե հնարավոր էր, սակայն այդ առիթը բաց է թողնվել: Թուրքիայում ցեղասպանությունը չի ճանաչվի, քանի դեռ Թուրքիան տակնուվրա չի եղել»,- ասել է հրապարակախոսը:

Աքթարի կարծիքով՝ Թուրքիայում միակ քաղաքական ուժը, որը, իշխանության գալով, կճանաչի Հայոց ցեղասպանությունը, ընդդիմադիր, քրդամետ Ժողովուրդների դեմոկրատական կուսակցությունն է: Քաղաքագետը, սակայն, բացառել է այդ կուսակցության երբևէ իշխանության գալը:

ԱՄՆ նախագահ Ջո Բայդենի կողմից ապրիլքսանչորսյան ուղերձում «ցեղասպանություն» բառի հնարավոր օգտագործումը թուրք հրապարակախոսը նորմալ է համարել: Նրա կարծիքով՝ դա կլինի ոչ թե պատիժ ոչ ժողովրդավար Թուրքիային, այլ ճշմարտության արտաբերում: Աքթարը, սակայն, մտավախություն ունի, որ Սպիտակ տան այն պաշտոնյաները, որոնք հանդուրժող են Անկարայի ռեժիմի հանդեպ, կարող են նախագահին հետ կանգնեցնել այդ որոշումից: