Ի՞նչ ունեցվածք է հայտարարագրել պաշտպանության նախկին նախարար Դավիթ Տոնոյանը

ՀՀ պաշտպանության նախկին նախարար Դավիթ Տոնոյանը պաշտոնական պարտականությունները դադարեցնելուց (2020 թվականի նոյեմբերի 20) հետո 2021 թվականի մարտի 25-ին բարձրաստիճան պաշտոնատար անձանց էթիկայի հանձնաժողով է ներկայացրել իր գույքի և եկամուտների հայտարարագիրը:

Տոնոյանը որպես անշարժ գույք հայտարարագրել է Նոր Նորք թաղամասում 2019 թվականին ձեռք բերված բնակարան:

Որպես շարժական գույք՝ 2003 թվականի արտադրության «Տոյոտա» մակնիշի ավտոմեքենա, որը նախկին նախարարը ձեռք է բերել 2004 թվականին:Արժեթղթեր, փոխառություններ, հանձնված ավանդներ, 8 միլիոն դրամի կամ դրան համարժեք արտարժույթից ավելի արժեք ունեցող գույք Դավիթ Տոնոյանը չի հայտարարագրել:

Տոնոյանը բանկային հաշվի վրա հայտարարագել է 2 միլիոն 9 հազար 6 հարյուր 93 դրամ, կանխիկ՝ 3 միլիոն 500 հազար դրամ:

Պարտականությունները դադարեցնելու օրը Դավիթ Տոնոյանն ունեցել է 11 մլն 812 հազար 738 դրամի չափով եկամուտ, որից 10 միլիոն 13 հազար 457 դրամը գոյացել է աշխատավարձից, իսկ 1 միլիոն 799 հազար 281 դրամը՝ կենսաթոշակից, որը ստացել է ՀՀ «ՍոցԱպ» պետական հիմնադրամից:

Տոնոյանի կինը՝ Զարուհի Մանուկյանը, որպես դրամական միջոց, հայտարարագրել է 2700 դոլար և 1 միլիոն 200 հազար դրամ:Հիշեցնենք, որ Դավիթ Տոնոյանն այժմ կալանավորված է: Նա, ըստ ԱԱԾ հաղորդագրության, կասկածվում է ավելի քան 2,2 միլիարդ դրամ հափշտակելու, կեղծիքներ կատարելու համար: