Ինչո՞վ են հայտնի 36 ընդդիմադիր պատգամավորները

Հայկական ժամանակը գրում է․Ըստ նախնական հաշվարկների ԱԺ առաջին նիստը կարող է տեղի ունենալ հուլիսի 26-ին: 8-րդ գումարման խորհրդարանում, ինչպես ավելի վաղ հայտնել ենք, կլինի 107 պատգամավոր, որից 36-ը՝ ընդդիմադիր:

Ստորեւ ներկայացնում ենք «Հայաստան» եւ «Պատիվ ունեմ» դաշինքների ցուցակներով անցողիկ տեղերում գտնվող պատգամավորների թեկնածուներին եւ նրանց վերաբերյալ որոշակի տեղեկություն:

Եվ այսպես, ովքե՞ր են լինելու «Հայաստան» դաշինքի ձեւավորած խմբակցության պատգամավորները, եթե, իհարկե, մանդատը վայր չդնեն՝ հօգուտ հաջորդների:

Առաջին համարը, ինչպես հայտնի է, Ռոբերտ Քոչարյանն է: Քոչարյանն իր կենսագրության հատվածում նշել է՝ «Սիստեմա ԲՖԿ» անկախ տնօրեն:

Խորհրդարան անցնելու շանս է ստացել Իշխան Սաղաթելյանը: Գեղարքունիքի մարզի Գեղամավան գյուղում ծնված դաշնակցականը եղել է Գեղարքունիքի մարզպետ, ԱԺ նախագահի տեղակալի խորհրդական, Բնապահպանության նախարարի խորհրդական: Պատմական գիտությունների թեկնածու է: Ունի 10 անշարժ գույք, որից 9-ը համատեղ սեփականություն են: Սաղաթելյանը Երեւանում ունի 2 բնակարան, իսկ Գեղարքունիքի Գեղամավան համայնքում՝ 8 հողամաս: Նա ունի նաեւ 8 մլն դրամանոց մատանի: Ըստ մամուլի հրապարակումների՝ հանդիսանում է 10.000 քմ տարածքով, Սեւանա լճի ափին գտնվող «Ծովասար Սեւան» ընտանեկան հանգստի համալիրի ներդրման իրականացնողը։ Համալիրի տնօրենը Իշխան Սաղաթելյանի հայրն է:

Պատգամավոր դառնալու նոր հնարավորություն է ստացել նաեւ գործող խորհրդարանում «Իմ քայլի» ցուցակով հայտնված Աննա Գրիգորյանը: Կապանցի պատգամավորը խորհրդարան անցավ ընդամենը վերջերս՝ «Իմ քայլի» պատգամավոր Տիգրան Կարապետյանի կողմից մանդատը վայր դնելուց հետո: Մանդատ ստանալուց անմիջապես հետո նա տեղափոխվեց հակադիր ճամբար՝ անդամագրվելով Սյունիքի նախկին մարզպետ Վահե Հակոբյանի հիմնադրած «Վերածնվող Հայաստան» կուսակցությանը: 

Սյունիքի նախկին մարզպետն, ի դեպ, հավակնում է լինել 8-րդ գումարման ամենահարուստ պատգամավորներից մեկը: Նա հայտարարագրել է 1 բնակարան Իսպանիայի Ալիկանտե քաղաքում, 2 բնակարան եւ 3 ավտոկայանատեղի՝ Երեւանի Դեմիրճյան փողոցում, 1 բնակարան եւ 1 հողամաս էլ՝ Վահագնի թաղամասում: Սյունիքի նախկին մարզպետն ունի տասնյակ միլիոն դոլարանոց արժեքով ժամացույցներ, արժեքավոր նկարներ:

Զանգեզուրի պղնձամոլիբդենային կոմբինատի խորհրդի անդամ է, եւ 1 տարվա կտրվածքով նրա եկամուտը կազմել է 72 միլիոն դրամ։ Ի դեպ, նա նախկին ՀՀԿ-ական է, ՀՀԿ Սյունիքի տարածքային կազմակերպության նախկին նախագահ:

Հաջորդիվ Արմեն Գեւորգյանն է: «Արինս գրուպ» ՍՊԸ գլխավոր տնօրենը: Ռոբերտ Քոչարյանի եւ Սերժ Սարգսյանի պաշտոնավարման տարիներին մշտապես եղել է իշխանության մեջ՝ զբաղեցնելով փոխվարչապետի, տարածքային կառավարման նախարարի, անվտանգության խորհրդի քարտուղարի պաշտոնները:

Հերթական անգամ պատգամավոր կարող է դառնալ նաեւ ՀՅԴ անդամ, դասախոս Լիլիթ Գալստյանը:

Հաջորդը ցուցակում կրկին դաշնակցական է՝  ՀՅԴ բյուրոյի անդամ Արմեն Ռուստամյանը: Նա Աժ մի քանի գումարման պատգամավոր է: Ռուստամյանի պատգամավորական գործունեության ամենահայտնի դրվագը կապված է ՍԴ նախկին նախագահ Հրայր Թովմասյանին տված հայտնի բնորոշման հետ:

Հիշեցնենք, լրագրողների հետ զրույցում անդրադառնալով ոչ իշխանական ուժերի կողմից կառավարությանն անվստահություն հայտնելու նախաձեռնությանը, Հրայր Թովմասյանը ասել էր՝ «ղալաթ են անում»: ԱԺ նիստերից մեկի ժամանակ անդրադառնալով Թովմասյանի այդ հայտարարությանը՝ Ռուստամյանը հայտարարել է. «Հիմա եթե մենք իրեն ասենք՝ ղալաթ ես անում՝ չաթլախ, չնեղանաք»: Ավելի ուշ նա պարզաբանեց, թե «չաթլախ»՝ նշանակում է ճաք տված:

Պատգամավորական մանդատ կարող է ստանալ նաեւ Պաշտպանության նախկին նախարար Սեյրան Օհանյանը: Մինչ նախարար լինելը նա եղել է ՀՀ Զինված ուժերի 5-րդ բանակային կորպուսի հրամանատար, Արցախի պաշտպանության նախարար,  ՀՀ ԶՈՒ ԳՇ պետ- պաշտպանության նախարարի առաջին տեղակալ:

Սեյրան Օհանյանը Արցախյան պատերազմների մասնակից է, պահեստազորի գեներալ- գնդապետ:

Ընտրություններին մասնակցել է նաեւ 2017 թ.՝ «Օհանյան- Րաֆֆի-Օսկանյան» դաշինքով: Ինչպես հայտնի է՝ դաշինքը չէր հաղթահարել խորհրդարան անցնելու շեմը:

Օհանյանին հաջորդում է է նախկին փաստաբան, ԲՀԿ-ական Էլինար Վարդանյանը: Նույնիսկ ԲՀԿ-ում եղած ժամանակ Վարդանյանը հայտնի էր որպես քոչարյանական թեւի ներկայացուցիչ:

Վերջինս մեկ այլ քոչարյանական պատգամավոր Ստեփան Մարգարյանի հետ ԲՀԿ-ից հեռացվեց 2015 թ. հոկտեմբերի 8-ին՝ ԲՀԿ Կենտրոնի տարածքային կազմակերպության խորհրդի որոշմամբ: Պատճառն այն էր, որ երկու պատգամավորները, չենթարկվելով խմբակցության դիրքորոշմանը, բոյկոտեցին Սերժ Սարգսյանի նախաձեռնած սահմանադրական բարեփոխումների քվեարկությունը:

Արծվիկ Մինասյան.- ՀՅԴ կարկառուն ներկայացուցիչ է, մի քանի գումարման ԱԺ պատգամավոր: ՀՀԿ-ՀՅԴ կոալիցիաների արդյունքում մի քանի անգամ հնարավորություն է ստացել նախարարի պորտֆել ստանալ: Եղել է տնտեսական զարգացման եւ ներդրումների նախարար, էկոնոմիկայի նախարար, աշխատանքի եւ սոցիալական հարցերի նախարարի տեղակալ :

Արթուր Ղազինյան.- «Մեկ Հայաստան» կուսակցության նախագահն է: 1999-2002 թթ. պաշտոն է զբաղեցրել Սահմանադրական դատարանի աշխատակազմում, 2004-2008 թթ.՝ ՀՀ Կառավարության աշխատակազմում, եղել է ՀՀ տարածքային կառավարման նախարարի խորհրդական:

Դաշինքի անցողիկ տեղերից մեկն էլ բաժին է ընկել ՀՅԴ երիտմիության անդամ Քրիստինե Վարդանյանին: Նա հայտնի է Կրթության նախկին նախարար Արայիկ Հարությունյանի դեմ ակցիաներից:

Գեղամ Մանուկյանը «Երկիր Մեդիա» հեռուստաընկերության լրատվական քաղաքական ծրագրերի տնօրենն է, պատերազմից հետո վարում էր Վազգեն Մանուկյանի ղեկավարած «17+» շարժման հավաքները: Մասնագիտությամբ թուրքագետ է:  

2018-ին, հակառակ խմբակցության որոշման՝ վարչապետի պաշտոնում Նիկոլ Փաշինյանի թեկնածությանը դեմ քվեարկելու համար դաշնակցությունից հեռացված Աղվան Վարդանյանը ծնունդով Նախիջեւանի Գեմուր գյուղից է: Մոտոհրաձգային զորքերի պահեստազորի լեյտենանտ է։ Մի քանի անգամ պատգամավոր է եղել, Քոչարյանի իշխանության տարիներին նաեւ զբաղեցրել է Աշխատանքի եւ սոցիալական հարցերի նախարարի պաշտոնը:

Խորհրդարանում առաջին անգամ որպես պատգամավոր հայտնվելու շանս է ստացել նաեւ 5-րդ ալիքի լրագրող Ագնեսա Խամոյանը: Նա աշխատել է նաեւ «Երկիր» թերթում եւ համանուն կայքում:

Խամոյանին հաջորդում է «Պոլիտէկոնոմիա» հետազոտական ինստիտուտի տնօրեն, քաղաքագետ Անդրանիկ Թեւանյանը:

Այնուհետեւ Մեղրի համայնքի ղեկավար Մխիթար Զաքարյանն է: Վերջինս Սյունիքում վարչապետի դեմ ակցիաների ակտիվ մասնակից էր եւ անցնում էր այդ կապակցությամբ հարուցված քրգործով:

Հռիփսիմե Ստամբուլյան.- «Հայաստան» դաշինքի ցուցակով պատգամավորի այս թեկնածուն հայտնի է տուրիստական ոլորտից: Նա «Անրիվա տուր» ՍՊԸ տնօրենն է: Այս ընկերությունը զբաղվում է ինչպես զբոսաշրջային, այնպես էլ միջազգային բեռնափոխադրումների բիզնեսով:  

Մանդատը վերցնելու պարագայում պատգամավոր կարող է դառնալ նաեւ ցուցակի 19-րդ համարը՝ Արագածոտնի նախկին մարզպետ, ՀՅԴ անդամ Աշոտ Սիմոնյանը: Նա նախորդ տարեվերջին ձերբակալվել, ապա ազատ էր արձակվել պատգամավոր Սիսակ Գաբրիելյանի եւ քաղաքացիների միջեւ Ազգային ժողովի դիմաց տեղի ունեցած միջադեպի առթիվ հարուցված քրգործի շրջանակներում: Հիշեցնենք, բողոքի ակցիա իրականացնող քաղաքացիները ԱԺ դիմաց ձվեր էին նետել  պատգամավորների ուղղությամբ, սկսվել էր հրմշտոց, հնչել էին հայհոյանքներ։

Ցուցակում 20-րդ՝ անցողիկ տեղում «Իզմիրլյան» ԲԿ տնօրեն Արմեն Չարչյանն է: Վերջինս կալանավորված է՝ ընտրություններին մասնակցելուն հարկադրելու համար։

«Անկախ դիտորդ» դաշինքը հրապարակել էր մի ձայնագրությունը, որտեղ լսվում է ենթադրաբար Չարչյանի ձայնը, որը բժշկական կենտրոնի աշխատակիցներին ասում է, որ «Հայաստան» դաշինքի ընտրացուցակում է եւ խնդրում է, պարտադրում անպայման մասնակցել ընտրություններին։ Ավելին՝ լսվում է նաեւ, թե ինչպես է զգուշացնում, որ ընտրություններից հետո կկարողանա իմանալ՝ ով է մասնակցել քվեարկությանը, ով՝ ոչ։

Չարչյանին հաջորդում է Ելենա Կիրակոսյանը՝ «Ջերմիկ անկյուն» հիմնադրամի տնօրեն: Այլ տեղեկություն նրա մասին հայտնի չէ:

Փոխարենը՝  համացանցում անսպառ ինֆորմացիա կա ցուցակի հաջորդ համարի՝ ավելի շուտ նրա հոր՝ Մհեր Սեդրակյանի (Թոխմախի Մհեր) մասին: Պատգամավորի թեկնածու Դավիթ Սեդրակյանը «Դռագսման» ՍՊԸ բաժնետեր է: Նրան է պատկանում «Երեւան ցեմենտ» գործարանը: Կրտսեր Սեդրակյանը ՀՀԿ ցուցակով եղել է նաեւ Երեւանի ավագանու անդամ: Զբաղեցրել է Էրեբունի համայնքի ղեկավարի խորհրդականի պաշտոնը:

ԱԺ անցնելու հնարավորություն են ստացել նաեւ նախկին վարչապետ Կարեն Կարապետյանի շրջապատի որոշ ներկայացուցիչներ:

Մասնավորապես, խոսքը նրա նախկին խորհրդական Ալեքսանդր Խաչատուրյանի մասին է: Խաչատուրյանը «ԹիՔեյ Ընդ Փարթներս» ՓԲԸ բաժնետեր է, ֆինանսական եւ բանկային իրավունքի մագիստրոս:

Հաջորդ թեկնածուն նախկին պատգամավոր Արմենուհի Կյուրեղյանն է՝ Վանաձորի պետական համալսարանի դասախոս է, ՀՅԴ անդամ, դոցենտ:

Նրան հաջորդում է Կարեն Կարապետյանի վարչապետության ժամանակ նրա օգնական եղած Արամ Վարդեւանյանը: Այժմ նա գրեթե բոլոր գործերով Քոչարյանի եւ նրա շրջապատի փաստաբանն է, «Ջեյ-Փի» փաստաբանական գրասենյակի հիմնադիր-տնօրենը: Նախկինում աշխատել է ՀՀ մարդու իրավունքների պաշտպանի աշխատակազմում, ՍԴ-ում:

Այնուհետեւ ՀՅԴ Բյուրոյի տնտեսական հետազոտությունների գրասենյակի ծրագրերի համակարգող Թադեւոս Ավետիսյանն է, ապա ԵՊՀ դասախոս Մարիաննա Եփրեմյանը, Սիսիանի համայնքապետ Արթուր Սարգսյանը, դասախոս Արթուր Խաչատրյանը:

Վերջին անցողիկ՝ 29-րդ տեղը բաժին է ընկնում ազգությամբ ասորի թեկնածուին՝ Արարատի մարզի Վերին Դվին գյուղի բնակիչ 26-ամյա Զեմֆիրա Միրզոեւային:

Չնայած ընտրությունների արդյունքում դաշինքների համար անցողիկ՝ 7 տոկոսի շեմը չհաղթահարելուն՝ Սահմանադրության պահանջով խորհրդարանը կունենա նաեւ «Պատիվ ունեմ» դաշինքից 7 պատգամավոր:

Այս դաշինքի առաջին 7-նյակում են.

Արթուր Վանեցյան.- ԱԱԾ նախկին տնօրեն, «Հայրենիք» կուսակցության նախագահ: Վերջինս պատերազմից հետո անցնում է մի քրգործով՝ մեղադրվելով իշխանության յուրացումը եւ վարչապետի սպանությունը նախապատրաստելու համար։ Վանեցյանը իր եկամուտներից եւ ունեցվածքից գրեթե ոչինչ չի հայտարարագրել, մեծ թվով բիզնեսներ, ըստ մամուլի հրապարակումների, գրանցված են հոր՝ Գագիկ Վանեցյանի անունով:

Տարոն Մարգարյան.- նշել է, որ չի աշխատում: Երեւանի նախկին քաղաքապետն է: Նրա դղյակների ու հարստության մասին նույնիսկ ֆիլմ էր նկարահանվել, իսկ հայտարարագրում գրեթե ոչինչ նշված չէ: Որպես անշարժ գույք հայտարարագրել է 1 ամառանոց Ջերմուկում, իսկ որպես շարժական գույք՝ «Mercedes-Benz S 450» մակնիշի ավտոմեքենա: Նշենք, որ Երեւանի քաղաքապետի պաշտոնից հեռանալուց հետո Մարգարյանն ուներ 8 անշարժ գույք:

Աննա Մկրտչյան.- ՀՀԿ երիտմիության անդամ, Քասախի համայնքապետ Արա Մկրտչյանի դուստրը:

Իշխան Զաքարյան.- Վերահսկիչ պալատի նախկին նախագահ, ԲՀԿ-ական նախկին պատգամավոր, Համահայկական խաղերի համաշխարհային կոմիտեի նախագահ, Հայաստանի օլիմպիական կոմիտեի նախկին նախագահ:

Հայկ Մամիջանյան.- ՀՀԿ անդամ, «Լույս» հիմնադրամի հետազոտությունների համակարգող:

Թագուհի Թովմասյան.- ԱԺ պատգամավոր է: 7-րդ գումարման խորհրդարանում է հայտնվել «Իմ քայլը» դաշինքի ցուցակով, խմբակցությունից դուրս է եկել պատերազմից հետո: «Ժողովուրդ» օրաթերթի հիմնադիրն է:

Տիգրան Աբրահամյան.- ՀՀԿ-անդամ է: Սերժ Սարգսյանի իշխանության օրոք եղել է ՀՀ նախագահի աշխատակազմ, «Հանրային կապերի տեղեկատվության կենտրոնի» փորձագետ, տնօրենի խորհրդական, այնուհետեւ Արցախի նախագահի անվտանգության հարցերով խորհրդական: «Հենակետ» վերլուծական կենտրոնի տնօրենն է: