Ինչ են հայտարարագրել դատախազի տեղակալ Սրբուհի Գալյանն ու նրա ամուսինը

ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալ Սրբուհի Գալյանը, որին այսօր արդարադատության երրորդ դասի պետական խորհրդականի դասային աստիճան է շնորհվել, 2021 թվականի մայիսի 31-ին Կոռուպցիայի կանխարգելման հանձնաժողով է ներկայացրել նախորդ տարվա իր հայտարարագիրը:

2020-ի տարեսկզբում համատեղ սեփականության իրավունքով ունեցել է 1 առանձնատուն Դիլիջանում եւ 1 բնակարան Երեւանի Կենտրոնում, որը տարեվերջում պահպանվել է:

Գալյանը տարեսկզբում 39 մլն 160 հազար 520 դրամի չափով փոխառություն է ունեցել «Ադդրես» ՍՊԸ-ում, որը տարեվերջում նույնչափ էլ մնացել է:

Նրա բանկային հաշվին եղել է 683 հազար 583 դրամ, որը տարեվերջում դարձել է 747 հազար 746 դրամ: Կանխիկ միջոցները եւս աճել են՝ 1600 դոլարը եւ 50 հազար դրամը տարեվերջում դարձել են 2000 դոլար եւ 2 մլն դրամ:

2020-ին Գալյանը մի շարք աղբյուրներից եկամուտ է ստացել: 7 մլն 689 հազար 780 դրամ աշխատավարձ է ստացել արդարադատության նախարարությունից, 3 մլն 487 հազար 725 դրամ՝ դատախազությունից, 277 հազար 686 դրամ՝ ԵՊՀ-ից, 101 հազար 890 դրամ աշխատավարձ՝ Արդարադատության ակադեմիայից, 30 հազար դրամ՝ ոստիկանության կրթահամալիրից: Բացի այդ, 1 մլն 518 հազար դրամ փոխառություն է ստացել «Կոնվերս բանկ»-ից եւ 3 մլն 300 հազար դրամ ֆինանսների նախարարությունից, որի եկամտի տեսակը նշված չէ:

Գալյանի ամուսինը՝ Պետրոս Մկրյանը, տարեսկզբում ունեցել է 6 անշարժ գույք Երեւանի Կենտրոնում, որը տարեվերջում 1-ով նվազել է: Նրան մնացել է համատեղ սեփականության իրավունքով 1 բնակարան եւ 1 առանձնատուն եւ միանձնյա սեփականության իրավունքով 1 բնակարան, 1 հողամաս եւ 1 ավտոկայանատեղի:

Մկրյանը տարեսկզբում ունեցել է «JEEP» մակնիշի ավտոմեքենա, որը տարվա ընթացքում օտարել է 300 հազար դրամով:

Նա տարեսկզբում 3 փոխառության գումար է ունեցել՝ 64 մլն 693 հազար 995 դրամի, 755 հազար 200 դրամի եւ 272 մլն 696 հազար 500 դրամի չափերով: Տարեվերջում նա ունեցել է 4 փոխառության գումար՝ 24 մլն 756 հազար 994 դրամի չափով, 229 մլն 68 հազար 900 դրամի չափով, 3 մլն 278 հազար 296 դրամի եւ 230 մլն դրամի չափերով:

Մկրյանի բանկային հաշվին տարեսկզբում եղել է 120 հազար 833 դոլար եւ 19 հազար 580 դրամ: Տարեվերջում նրա բանկային հաշիվներին եղել է 317 հազար դրամ:

Նրա կանխիկ միջոցները տարեսկզբում եղել են 2000 դոլար եւ 2 մլն 400 հազար դրամ, որը տարեվերջում աճել է 9500 դոլար եւ 3 մլն 500 հազար դրամով:

Գալյանի ամուսինը 2020-ին 4 մլն 199 հազար 490 դրամ աշխատավարձ է ստացել «Սիթի Սենթրալ» ՍՊԸ-ից, 2 մլն 500 հազար դրամ փոխառություն է ստացել «Ակբա բանկ»-ից, 1 մլն 745 հազար 37 դրամ՝ ֆինանսների նախարարությունից, որի եկամտի տեսակը նշված չէ: Բացի այդ, 2 գույքի օտարումից Մկրյանը ստացել է 124 մլն 300 հազար դրամ: