Ինչ ունեցվածք ունեն ԲՀԿ-ից առաջադրված Միքայել Մելքումյանն ու Կարապետ Գուլոյանը

«Բարգավաճ Հայաստան» կուսակցության 2-րդ համար Միքայել Մելքումյանը 3 անշարժ գույք ունի, որոնցից մեկը՝ Իսպանիայում:

Ուսումնասիրելով ԿԸՀ հրապարակած ընտրություններին մասնակցող ուժերի պատգամավորի թեկնածուների հայտարարագրերը, ՀԺ-ն նկատեց, որ Մելքումյանը բաժնային սեփականության իրավունքով 1-ական բնակարան ունի Երեւանում եւ Իսպանիայի Սալոու քաղաքում, ինչպես նաեւ 1 շինություն միանձնյա սեփականության իրավունքով՝ Երեւանի Արաբկիր վարչական շրջանում:

Վերջին 1 տարում Մելքումյանը որպես աշխատավարձ եկամուտ է ստացել՝ ՀՀ Ազգային ժողովից 9 մլն 149 հազար 360 դրամ, Հայաստանի պետական տնտեսագիտական համալսարանից՝ 5 մլն 30 հազար 835 դրամ, տրված փոխառությունների դիմաց եկամուտ է ստացել «Ամերիաբանկ»-ից՝ 2 մլն 637 հազար 971 դրամ եւ «Արդշինբանկ»-ից՝ 641 դոլար: Բացի այդ վարձակալության դիմաց եկամուտ է ստացել՝ «Բելենս Շիթ», «Ջի Էս Քոմփանի», «Էսպերտ ՍՎՍ», «Ֆաստ Տրանս», «Բիթկոդ Լաբ», «Մադոյան» եւ «Մայրո» ՍՊԸ-ներից՝ ընդհանուր առմամբ 4 մլն 690 հազար դրամ:

Հայտարարագիրը ներկայացնելու օրվա դրությամբ Մելքումյանն ունեցել է 5 մլն դրամ եւ 331 հազար դոլար: Նա նաեւ հայտարարագրել է «Ամերիաբանկ»-ի պարտատոմս՝ 950 հատ 100 ԱՄՆ դոլարանոց:

ԲՀԿ ցուցակի 5-րդ համարը՝ Գագիկ Ծառուկյանի փեսա Կարապետ Գուլոյանը, որը նաեւ Կոտայքի նախկին մարզպետն է եղել, հայտարարագրել է 1 բնակարան Երեւանում եւ 1 բնակելի տուն Առինջ գյուղում: Հայտարարագիրը ներկայացնելու օրվա դրությամբ Գուլոյանն ունեցել է 1 մլրդ 920 մլն դրամ եւ 407 հազար 250 դոլար:

Վերջինս 33.33 տոկոս բաժնեմաս ունի «Դակավա Քոնսթրաքշն» ՍՊԸ-ում եւ 50.54 տոկոս բաժնետոմս՝ «Էլեկտրամոնտաժ» ԲԲԸ-ում: