Իսրայելի դատարանը գործ է հարուցել Արցախում հայկական դիրքերի դեմ ԱԹՍ կիրառած իսրայելական ընկերության դեմ

Իսրայելական դատարանը մեղադրանք է առաջադրել անօդաչու թռչող սարքեր արտադրող այն ընկերությանը, որը կասկածվում էր հայկական դիրքերի դեմ ԱԹՍ կիրառելու մեջ։ Ընկերության և դրա 3 բարձրաստիճան աշխատակիցներ մեղադրվում են պաշտպանողական արտադրանքի արտահանումը կարգավորող օրենքը խախտելու համար։

Այս մասին տեղեկացնում է իսրայելական Haaretz պարբերականը: Քրեական գործի մանրամասները թերթը չի հաղորդում` վկայակոչելով դատարանի համապատասխան արգելքը,-հաղորդում է Հայաստանի Հանրային Ռադիոն։

Ռազմական փորձագետ Ռուբեն Մեհրաբյանը հիշեցնում է՝ սա հենց այն ընկերությունն է, որը 2017թ սկանդալի կենտրոնում էր հայտնվել, երբ մամուլը պարզել էր, որ ընկերության աշխատակիցներն Ադրբեջան այցի ընթացքում հարվածային անօդաչու սարքերի կարողությունները ադրբեջանական կողմին ցուցադրել էին հայկական դիրքերի դեմ իրականացված հարվածի միջոցով: Փորձագետը կարծում է, որ դատական գործընթացի հիմքում հենց այս միջադեպն է։

«Խոսքը հավանաբար այն մասին է, որ այդ ընկերության մասնագետները մատակարարվելիք զինատեսակները փորձարկել են հայկական զորքերի ուղղությամբ, ինչն իսրայելական օրենքներով արգելված է, դրա իրավունքը իրենք չունեին։ Նույնիսկ եթե կոնֆլիկտի կողմ հանդիսացող երկրի զենք են մատակարարում, ապա դա չի նշանակում և չպետք է նշանակի, որ նրանք ինչ-որ մասնակցություն պետք է ունենան այդ կոնֆլիկտին»,-ասում է Ռուբեն Մեհրաբյանը։