Իրանի ԱԳ նախարարի հետ խոսել ենք, այսպես կոչված, Զանգեզուրի միջանցքի մասին, փաստել ենք, որ չկա նման թեմա. Միրզոյան

Այսօր ԱԺ-Կառավարություն հարցուպատասխանի ժամանակ ՔՊ պատգամավոր Մարիա Կարապետյանն արտաքին գործեի նախարար Արարատ Միրզոյանից հետաքրքրվեց, թե վերջինիս այցը Իրանի Իսլամական Հանրապետություն ի՞նչ արդյունք է տվել, և ինչպե՞ս է այցը ազդելու մեր երկու պետությունների հարաբերությունների վրա:

Միրզոյանի խոսքով՝ իր և Իրանի ԱԳ նախարար Հոսսեյն Ամիր Աբդոլլահիանի հանդիպումը ջերմ հարաբերություններ է թողել իր մոտ:

«Այս մեկուկես ամսվա ընթացքում մենք ունեցել ենք մեկ հեռախոսազրույց, հանդիպել ենք Տաջիկստանում, մասնակցել ենք վարչապետ Փաշինյանի և նախագահ Ռաիսի հանդիպմանը, ապա նաև՝ Թեհրանում: Բաց է իմ առաջարկը Հոսսեյն Ամիր Աբդոլլահիանին՝ այցելելու Երևան: Այս այցը շատ լավ առիթ էր՝ քննարկելու մեր երկկողմ հարաբերությունների հետ կապված բոլոր հարցերը, իսկ մեր երկկողմ օրակարգը շատ հարուստ է: Մենք հնարավորություն ենք ունեցել քննարկելու կիսատ և ընթացքի մեջ գտնվող ծրագրերի մասին, նորերի մասին, որոնցից մեկը նոր բարձրաոլտի կառուցումն է և գազի-էլեկտրաէներգիայի փոխանակման ժամկետի ընդլայնման պայմանագրի կնքումը, ինչպես նաև Մեղրիի հէկի բանակցությունները»:

Միրզոյանը ողջունեց Իրանի Իսլամական Հանրապետության դիրքորոշումը մեր սահմանների անձեռնմխելիության վերաբերյալ. «Եվ բոլոր այն դրական ազդակները, որոնք մենք ստանում ենք այս առնչությամբ: Խոսել ենք նաև, այսպես կոչված, Զանգեզուրի միջանցքի մասին: Փաստել ենք, որ չկա նման թեմա և չի կարող լինել»:

Նախարարն ընդգծեց՝ տարածաշրջանային ենթակառուցվածքների մասին նույնպես խոսք եղել է:

«Քննարկում ենք նաև Պարսից Ծոց-Սև ծով միջանցքի թեման: Այստեղ մեծ հետաքրքրություն ունի նաև Հնդկաստանը, օրեր անց այստեղ կհյուրընկալենք Հնդկաստանի արտաքին գործերի նախարարին»,- եզրափակեց Միրզոյան: