«Վերածնվող առյուծ» գործողություն,— այսպես է Իսրայելն անվանել Իրանի միջուկային օբյեկտների դեմ իրականացված հարձակումները։ Վարչապետ Բենյամին Նեթանյահուն ելույթ է ունեցել, որտեղ բացատրել է, թե ինչու է ընդունվել այդ որոշումը, ինչպես նաև հաշտարար ուղերձով դիմել է իրանցի ժողովրդին։
«Այս գործողությունը կշարունակվի այնքան ժամանակ, որքան պետք լինի՝ սպառնալիքը վերացնելու համար։ Տասնամյակներ շարունակ Թեհրանի բռնապետերը բացահայտ ու անամոթ կերպով կոչ են արել Իսրայելի ոչնչացմանը։ Նրանք իրենց ցեղասպան կոչերը զուգորդել են միջուկային զենքի մշակման ծրագրով։ Վերջին տարիներին Իրանը արտադրել է բավարար քանակությամբ հարստացված ուրան՝ ինը ատոմային ռումբի համար։ Եթե նրան չկանգնեցնենք, Իրանը շատ կարճ ժամանակում կկարողանա ստեղծել ատոմային ռումբ։ (…) Սա Իսրայելի գոյությանը սպառնացող բացահայտ և անմիջական վտանգ է։
Անցյալ տարի Իրանը Իսրայելի վրա արձակեց 300 բալիստիկ հրթիռ։ Այդ հրթիռներից յուրաքանչյուրն ունի մեկ տոննա պայթուցիկ նյութ և սպառնում է հարյուրավոր մարդկանց կյանքին։ Շուտով այդ հրթիռները կկարողանան կրել նաև միջուկային մարտագլխիկ — և այդ ժամանակ արդեն վտանգված կլինեն ոչ թե հարյուրավոր, այլ միլիոնավոր կյանքեր։ Պատկերացրեք՝ 10 000 տոննա տրոտիլ է նետվում Նյու Ջերսիի չափ երկրի վրա»։
Նեթանյահուն նաև պատմական համատեքստ տվեց տեղի ունեցողին՝ ասելով, որ գրեթե 100 տարի առաջ, նացիստների առջև կանգնած, «առաջնորդների մի ամբողջ սերունդ չկարողացավ ժամանակին գործել».
«Նրանք վճռական էին ցանկացած գնով խուսափել նոր պատերազմից և արդյունքում ստացան պատմության մեջ ամենասարսափելի պատերազմը։ Գործողությունից զերծ մնալը հանգեցրեց Երկրորդ համաշխարհային պատերազմի՝ ամենամահաբեր պատերազմի՝ 60 միլիոն զոհերով, այդ թվում 6 միլիոն հրեա՝ իմ ժողովրդի մեկ երրորդը։ Այդ պատերազմի ավարտից հետո հրեա ժողովուրդը և հրեա պետությունը երդվեցին. «այլևս երբեք»։ Եվ ահա՝ «այլևս երբեք»՝ դա հենց այս պահն է։ Այսօր Իսրայելը ցույց տվեց, որ մենք պատմությունից դասեր ենք քաղել։
Մենք ջախջախել ենք ՀԱՄԱՍ-ը, ոչնչացրել ենք «Հեզբոլլահ»-ը։ Իսկ երբ Իրանը անցած տարի երկու անգամ ուղիղ հարձակումներ կատարեց մեր դեմ, մենք պատասխանեցինք հենց Իրանի տարածքում։
Ինքներս մեզ պաշտպանելով՝ մենք նաև ուրիշներին ենք պաշտպանում։ Մենք պաշտպանում ենք մեր արաբ հարևաններին։ Նրանք ևս տուժել են Իրանի սերմանած քաոսի ու կոտորածների արշավից։ Մեր գործողությունները ընդդեմ իրանական «Հեզբոլլահ»-ի հանգեցրին Լիբանանում նոր կառավարության ձևավորմանը և Ասադի մահաբեր ռեժիմի անկմանը Սիրիայում։ Այդ երկու երկրներում մարդիկ հիմա հնարավորություն ունեն այլ ապագայի, ավելի լավ ապագայի։
Սա նաև վերաբերում է խիզախ իրանցի ժողովրդին։ Ես ունեմ ուղերձ ձեզ. մեր պայքարը ձեր դեմ չէ։ Մեր պայքարը մի դաժան բռնապետության դեմ է, որը 46 տարի շարունակ ձեզ ճնշում է։ Ես հավատում եմ՝ ձեր ազատության օրը մոտ է։ Եվ երբ այդ օրը գա, մեր երկու հինավուրց ժողովուրդների միջև մեծ բարեկամությունը կրկին կծաղկի։ Ցանկանում եմ վստահեցնել քաղաքակիրթ աշխարհին, որ մենք թույլ չենք տա աշխարհում ամենավտանգավոր ռեժիմին ձեռք բերել աշխարհի ամենավտանգավոր զենքը»։
Իրանագետ Արտյոմ Տոնոյանը խոսելով ատեղծված իրավիճակի մասին` տելեգրամի իր ալիքում հայտնել է, որ Իրանի վրա այսօր առավոտ աննախադեպ հարձակում իրականացրած Իսրայելի միակ դաշնակիցը և հենարանը Իրանի հյուսիսային սահմաններին Ադրբեջանն է և այս օրերի ընթացքում Ադրբեջանը լինելու է սպասվող իրադարձությունների կիզակետում։