Լուծարվող ծառայությունների աշխատակիցների հետագա աշխատանքի խնդիրն ԱՆ-ն կփորձի լուծել. Արսեն Թորոսյան

Նախորդ օրերին Մարալիկի, այսօր արդեն Եղվարդի բժշկական հաստատությունների աշխատակիցների մեղադրանքներին և համացանցում հնչող կարծիքներին պատասխանելու համար Արսեն Թորոսյանն այսօր հանդիպել է լրագրողների հետ:

Արսեն Թորոսյանը նշեց, որ եթե չկան մասնագետներ, չկան սարքավորումներ, ինչքան էլ լուծարման գնացող ծննդատների աշխատակիցները ճանապարհ փակեն, այդ ծննդատները չեն գործելու:

Թորոսյանը հստակեցնում է` բացի Եղվարդի ծննդատնից, մյուսները կա´մ առողջության կենտրոններ են, կա´մ էլ բուժկենտրոններ, և ոչ թե դրանց փակմանը կամ լուծարմանն են գնալու, այլ միայն ծննդօգնության ծառայություն չեն մատուցելու այդ կենտրոններում։

«Սրանք գյուղական ամբուլատորիաներ են, որոնք վերանվանվել են առողջության կենտրոններ, սակայն սովետական ժամանակաշրջանում ունեցել են նաև ստացիոնար ծառայություններ, որոնց շատ փոքր թիվը մինչև օրս պահպանվել է: Ոչ մի բժշկական հաստատություն չի փակվում: Լուծարվող ծառայությունների աշխատակիցների հետագա աշխատանքի խնդիրն առողջապահության նախարարությունը կփորձի լուծել, սակայն, մյուս կողմից, որևէ մեկի զբաղվածության հարցը չի կարող հակասել կյանք փրկելուն»:

Առողջապահության նախարարը թվեր հրապարակեց, թե չֆինանսավորվող ծննդատներից ինչ հեռավորության վրա է գտնվում դրանց փոխարինող ամենամոտ ծննդատունը։

Օրինակ` Աչաջուրի ԲԿ-ից Իջևանի ԲԿ 16 կմ է, Եղվարդից Աբովյան՝ 16.6 կմ, Եղվարդից Երևանի «Սուրբ Գրիգոր Լուսավորիչ» ԲԿ՝ 26.4 կմ, իսկ Արտենիից Արմավիր 32 կմ է։