Կառավարության ֆինանսավորմամբ Շիրակի մարզում 55 տուն կկառուցվի

Կառավարությունը 988 մլն 140 հազար դրամ  է հատկացրել Շիրակի մարզում անօթևանության խնդրի լուծման համար։ Այս գումարի մեծ մասը՝ 968 մլն 705 հազար դրամը, կտրամադրվի Շիրակի մարզի 8 գյուղական բնակավայրերում ծրագրի շահառու ճանաչված 55 ընտանիքների համար բնակարանաշինությանը։

Շիրակի մարզի 13 գյուղերում 172 անօթևան ընտանիք էր հաշվառված։ Վերջին տարիների ընթացքում նրանցից շատերը բնակարանի գնման վկայագրեր են ստացել, իսկ 55 ընտանիք փոխհատուցման այս տարբերակին չէր համաձայնել։

«Այս տարվա սկզբին մենք գյուղական բնակավայրերի 90 ընտանիքների հատկացրել են բնակարանի գնման վկայագրեր։ Նրանց մի մասն արդեն բնակարան ձեռք է բերել։ Իսկ 55 անօթևան ընտանիքներ չէին համաձայնել վկայական ստանալ և պահանջում էին բնակարանաշինություն։ Այս ծրագիրը այդ ընտանիքների համար է։ Նման ընտանիքներ, բացի Շիրակից, կան նաև Արագածոտնի և Լոռու մարզերում։ Նրանց համար բնակարանաշինություն է լինելու։

Շիրակի մարզի գյուղերում հաշվառված 55 ընտանիքներից 28-ը միայն Ջրաձոր գյուղում է։ Այս բնակավայրը տեղափոխվելու է և 28 տներ են կառուցվելու նոր վայրում։ Ի սկզբանե, Ջրաձորում 43 ընտանիք էր հաշվառված։ Նրանց մի մասը փոխհատուցում է ստացել վկայագրերի տեսքով։ Մյուսների համար այս ծրագրով տներ են կառուցվելու։ 19 մլն 319 հազար դրամ էլ հատկացվելու է 4 ընտանիքի բնակարանի գնման վկայագիր տրամադրելու համար։ Խոսքը դատական կարգով անօթևանության կարգավիճակը վերականգնած ընտանիքների մասին է»,- SHANTNEWS.am-ին ասել է Շիրակի մարզպետարանի քաղաքաշինության վարչության պետ Ալբերտ Մարգարյանը։

Դատարանում բնակարանային փոխհատուցման իրավունքը վիճարկած 4 ընտանիքներից 3-ը Գյումրիի բնակիչներ են, 1-ը ՝ գյուղական բնակավայրից։
Կառավարությունը նաև նախագիծ էր կազմել Գյումրիում 4 վթարային շենքերի բնակիչների փոխհատուցման համար։ Խոսքը Իսահակյան 9, Ղուկասյան 29, Անտառավանի 26 և Տիգրան Մեծի 5 շենքերի մասին է։ Նախատեսվում է ամրացնել Տիգրան Մեծի 5 շենքը, իսկ մյուս շենքերի բնակիչների փոխհատուցումը լինելու է վկայագրերով։
Այս նախագիծը, ըստ Ալբերտ Մարգարյանի, դեռ գործնական փուլ չի մտել։