Կառավարությունը 116 հազար եվրոյով ձեռք է բերել նոր բարձրակարգ ռոյալ. դրանով առաջին անգամ կնվագի Մանսուրյանը

Կ. Դեմիրճյանի անվան մարզահամերգային համալիրը համալրվել է «Ստենվեյ» (Steinway) ռոյալով: Այս պահին համալիրի համերգային դահլիճում տեղի է ունենում շնորհանդեսը։ Հանդիսատեսի համար մուտքը փակ է, ներկա են միայն լրագրողները:

Ռոյալն առաջինը «կփորձարկի» ՀՀ ժողովրդական արտիստ‚ կոմպոզիտոր Տիգրան Մանսուրյանը։ Միջոցառման մեկնարկին կցուցադրվի տեսանյութ‚ որը պատմում է «Ստենվեյ»-ի գնման‚ Հայաստան տեղափոխման մասին։ Ի դեպ, այս կարգի «Ստենվեյ» Երեւանում երկրորդը չկա։

Ռոյալը ձեռք է բերվել ՀՀ կառավարության աջակցությամբ Համբուրգի «Ստենվեյ և որդիներ» գործարանից, որը համարվում է երաժշտական գործիքների արտադրության ոլորտում առաջատարը: Ռոյալի գործարանային արժեքն ավելի քան 170 հազար եվրո է‚ սակայն Մարզահամերգային համալիրի ղեկավարության ջանքերով եւ երկարատեւ բանակցությունների արդյունքում գործիքը ձեռք է բերվել 116 հազար 670 եվրոյով (138 հազար դոլար)։

Հայաստանի պետական սիմֆոնիկ նվագախմբի մամուլի քարտուղար Լիլիթ Գրիգորյանը ՀԺ-ին հայտնեց, որ Մարզահամերգային համալիրի եւ Հայաստանի պետական սիմֆոնիկ նվագախմբի կողմից կազմակերպված շնորհանդեսի ընթացքում ելույթ կունենան երիտասարդ սոպրանո Ջուլիանա Գրիգորյանը, դաշնակահար Հայկ Մելիքյանն ու Սիմֆոնիկ նվագախմբի լարային կազմը՝ դիրիժոր Սերգեյ Սմբատյանի ղեկավարությամբ։ Համերգային ծրագրում կհնչեն հատված Տիգրան Մանսուրյանի Հայրեններից եւ Ֆանտազիան։

Մարզահամերգային համալիրի տնօրեն Կարեն Ղազարյանի խոսքով՝  Հայաստանում լավագույն ակուստիկա եւ պայմաններ ունեցող համերգային սրահը չէր կարող չունենալ նման կարգի գործիք. աշխարհի լավագույն դաշնակահարները չեն համաձայնի նվագել դահլիճում‚ որտեղ չկա «Ստենվեյ»։ Ըստ Կարեն Ղազարյանի՝ նոր ռոյալով համալրումը կնպաստի‚ որպեսզի Հայաստանի երաժշտական կյանքն ավելի ակտիվանա‚ հայ երաժշտասերները հնարավորություն ստանան ունկնդրելու ամենապահանջված արտիստներին։

Մարզահամերգային համալիրը չի սահմանափակվելու «Ստենվեյ»-ով‚ եւ առաջիկայում նախատեսվում է ձեռք բերել նաեւ այլ երաժշտական գործիքներ: Այդ ուղղությամբ մշակվում են ծրագրեր։ Երաժշտական գործիքներով համալրումը թույլ կտա‚ որպեսզի մարզահամերգային համալիրում ավելի հաճախ կայանան դասական երաժշտության համերգներ։

Մարզահամերգային համալիրում «Ստենվեյ»-ը պահվելու է հատուկ պայմաններում (ջերմային հատուկ ռեժիմ‚ խոնավության անհրաժեշտ մակարդակ և այլն):