Կարեն Կարապետյանի նախկին խորհրդականը՝ սկանդալի կենտրոնում. կալանավորվել է նրա հայրը

Իրական սկանդալ է հասունացել Ղազախստանում ՀՀ պատվո հյուպատոս Հայկ Տերտերյանի ու վերջինիս որդու՝ ՀՀ նախկին վարչապետ Կարեն Կարապետյանի նախկին խորհրդական Մհեր Տերտերյանի անվան շուրջ:

Նրանցից մեկը կալանավորվել է, մյուսը՝ հայտնվել աղմկոտ պատմության կենտրոնում:

Մասնավորապես ղազախական zakon.kz-ն օրեր առաջ հայտնել է, որ Ղազախստանում ՀՀ պատվա­վոր հյուպատոս Հայկ Տերտերյանը մեղադրվում է Ղազախստանի բնապահպանական օրենսդրությունը խախտելու մեջ: Նրա նկատմամբ որպես խափանման միջոց է ընտրվել տնային կալանքը: Հյուպատոսին սպառնում է 7-10 տարվա ազա­տազրկում: Բացի կալանքը՝ հյուպատոսին ավելի վաղ 7 մլրդ թենգե տուգանք էր սահմանվել բնապահպանական վնասի համար, ինչը մոտ 7,5 մլն դոլար է կազմում:

Բանն այն է, որ Ղազախստանի Ակտյուբինսկի շրջանի բնակիչները մեծ բողոքի ալիք էին բարձրացրել համայնքով անցնող գետում ձկների մեծաթիվ անկման պատճառով, որը, ըստ բնակիչների, տեղի է ունեցել հյուպատոսի որդուն՝ Մհեր Տերտերյանին պատկանող խոզաբուծական ֆերմայի կենդանական թունավոր մնացորդները՝ օրական մի քանի հարյուր խոզի գլուխներն ու փորոտիքը գետը նետելու հետևանքով: Մհեր Տերտերյանը «Պարիժսկայա կոմունա» ՍՊԸ-ի տնօրենն է, որին էլ պատկանում է խոզաբուծարանը:

Աղմուկը նոր չէ: Արդեն երկար տարիներ Բեստամակ գյուղի բնակիչները պա­հանջում են փակել Տերտերյանների խոզաբուծարանը, որը գտնվում է նրանց գյուղի տարածքում, սարսափելի գարշահոտություն տարածում, աղտոտում շրջակայքը: 

Ղազախական լրատվամիջոցների փոխանցմամբ, Ակտյուբինսկի մարզի բնապահպա­նական վարչությունը հաստատված է համարում, որ խո­զաբուծական համալիրը կենսաբա­նական թափոններն ուղղակի թաղել է Բեստամակ գյուղի տարածքի հողերում, մնացորդներն էլ՝ նետել գետը: Բնակիչների խոսքերով, ամեն օր մոտ 300 խոզի թափոն է դուրս եկել:

Պարզվել ու հաստատվել է, որ երկու տարի ձեռնարկությունը թափոններն արտանետել է շրջա­կա միջավայր՝ չունենալով հա­մապատասխան թույլտվություն:

Խոզաբուծարանի սեփականատերերից մեկը թեև Մհեր Տերտերյանն է, բայց այն ընտանեկան բիզնես է: 

Նշենք, որ Կարեն Կարապետյանի նախկին խորհրդականն ու գործարարը Հայաստանում են, նա ցանկանում է կուսակցություն բացել ու մասնակցել առաջիկա խորհրդարանական ընտրություններին: Այս մասին մեզ հետ զրույցում ավելի վաղ հայտնել է ինքը Մհեր Տերտերյանը: