ԿԳՄՍՆ նախարարն ինքն իրեն երկու հարց է տվել ու պատասխանել

Կրթության, գիտության, մշակույթի եւ սպորտի նախարար Վահրամ Դումանյանը այսօր հրավիրած ասուլիսում ներկայացրեց 100-օրյա պաշտոնավարման արդյունքները եւ պատասխանեց լրագրողներին հետաքրքրող հարցերին: Կային նաեւ հարցեր, որոնք նախարարն անկնկալում էր ստանալ, բայց այդպես էլ չստացավ: Դրանք նա ինքն իրեն տվեց ու պատասխանեց՝  նկատելով, որ այդ հարցերը շատ կարեւոր են եւ չանդրադառնալ չի կարելի: 

Իր խոսքով՝ երկու հարցերից մեկը տհաճ է, մեկը՝ հաճելի: Սկսելով ոչ այնքան հաճելի հարցից՝ նախարարը նշեց, որ խոսքը վերաբերում է մշակութային արժեքներին ու նրանց պահպանությանը:

«Մշակութային դաշտում եղած այսօրվա պրոբլեմները խիստ մտահոգող են եւ դեռեւս մնում են չլուծված: Իհարկե, արտգործնախարարության եւ կրթության նախարարության միջեւ համատեղ քննարկումների արդյունքում անընդհատ ուղիներ ենք փնտրում, թե ինչպես միջազգային հանրության ուշադրությունը ավելի շատ սեւեռենք այս խնդրին»,- ասաց ԿԳՄՍ նախարարը:

Նախարարը նշեց, որ մշակութային մոտ 4000 արժեքի պահպանման մասին է խոսքը, եւ թեեւ հարցը գտնվում է ՅՈՒՆԵՍԿՕ-ի դաշտում, եւ միջազգային հեղինակավոր կառույցների ղեկավարների այցելությունների ժամանակ անընդհատ քննարկվում են այդ խնդրի լուծման իրական ուղղությունները, բայց իրականում հարցը դեռեւս լուծում չի ստանում:

Նախարարը ավելացրեց, որ ակնկալում են միջազգային բոլոր կառույցներից հարցի լուծման իրատեսական նախաձեռնություն, քանի որ այդ մշակութային արժեքները ոչ միայն ազգային են, այլեւ համամարդկային:

Հաճելի հարցը, ըստ նախարարի, վերաբերում էր գիտության ֆինանսավորմանը: Նա տեղեկացրեց, որ Կառավարությունը որոշել է 2 միլիարդ դրամով այս տարի Գիտության կոմիտեի բյուջեն ավելացնել՝ գիտության ոլորտի զարգացման ուղղությամբ: Նա նշեց, որ իհարկե այդ գումարը լիարժեք չի բավարարի բոլոր խնդիրների լուծման համար, բայց շատ հարցեր կլուծի: Ապա հավելեց, որ այստեղ միայն գումար տալով չէ. պետք է լինի հստակ աշխատանքի չափելիություն, վերջնարդյունք, որպեսզի գումարները չփոշիանան, այլ ծառայեն ըստ նպատակի: