Կենսաթոշակառուների համար կգործի զեղչային նոր համակարգ. Նիկոլ Փաշինյան

ՀՀ վարչապետ Նիկոլ Փաշինյանը այսօր Կառավարության նիստի ժամանակ հայտարարեց, որ Կառավարությունը նախատեսում է սոցիալական նշանակության նոր համակարգ ներդնել, ըստ որի՝ թոշակառուի կողմից բանկային քարտով գնումներ անելու դեպքում որոշակի տոկոսով գումար հետ է փոխանցվելու նրա քարտին։

«Մենք աշխատում ենք կանխիկի շրջանառության կանխման ուղղությամբ և առաջիկայում պետք է ներդնենք հետևյալ համակարգը, որ բոլոր կենսաթոշակառուների բանկային քարտերով արվող առևտրի նկատմամբ պետք է կիրառենք զեղչերի համակարգ: Այսինքն՝ եթե թոշակառուն առևտուրն իրականացնում է բանկային քարտի միջոցով, ուզում ենք զեղչերի համակարգ ներդնել, որն ունի մի քանի նշանակություն. առաջինը սոցիալական նշանակությունն է, երկրորդը՝ կանխիկի շրջանառության կրճատումը, և երրորդը՝ դրա արդյունքում կարող ենք ավելի արդյունավետ դարձնել մեր սոցիալական քաղաքականությունը և գտնել կենսաթոշակառուների կարիքների առավել զգայուն կետերը»,- ասաց վարչապետը:

Ըստ Փաշինյանի՝ այս համակարգը կունենա և՛ սոցիալական, և՛ կնպաստի կանխիկի շրջանառության կրճատմանը: Եղել են արդեն բանավոր խոսակցություններ տարբեր ընկերությունների հետ այս նախագծում ներգրավելու համար:

«Սա պետության և մասնավորի համագործակցության կարևոր օրինակ է, և հույս ունեմ, որ կհամաֆինանսավորվի Կառավարության, բանկային համակարգի կողմից և արդեն՝ մասնավորի կողմից: Երրորդ նշանակությունն այն է, որ այդ առևտրի, այդ գործարքների տվյալների վերլուծության արդյունքում կկարողանանք առավել արդյունավետ դարձնել մեր սոցիալական քաղաքականությունը»,- նշեց վարչապետը:

Կառավարության ղեկավարի խոսքով՝ սա մոտավորապես նույն մոդելն է, որն իրականացվում է նաև ուսուցիչների աշխատավարձերի բարձրացման դեպքում: Կառավարության ղեկավարը հույս հայտնեց նաև, որ գործնականում հունիսի կեսերից համակարգը լիարժեք՝ քարտերով և բանկային համակարգով և առևտրային ցանցերով, կսկսի գործել: