Կոլումբիայի ընդդիմադիր գործիչը և նախագահական թեկնածու Միգել Ուրիբեն կյանքից հեռացավ 39 տարեկանում՝ երկու ամիս շարունակ հիվանդանոցում գտնվելուց հետո։ Նա ծանր վիրավորվել էր հունիսի 8-ին՝ Բոգոտայում, նախընտրական ելույթի ժամանակ երկու գնդակ դիպել էր գլխին, մեկ ուրիշը՝ ծնկին։ Ոստիկանության տվյալներով՝ կրակողը 15-ամյա դեռահաս է եղել, որին, ըստ նախնական տեղեկությունների, վարձել են Կոլումբիայի հեղափոխական զինված ուժերի (FARC) նախկին անդամներ։
Վեց կասկածյալ արդեն կալանավորված է։ Ուրիբեն, հայտնի լինելով որպես Կոլումբիայի ձախական իշխանությունների կոշտ քննադատ՝ 2024 թվականի հոկտեմբերին հայտարարել էր, որ կմասնակցի 2026-ի նախագահական ընտրություններին։ Նա հայտնի քաղաքական ընտանիքից էր․ պապը՝ Խուլիո Սեսար Տուրբայը, եղել է Կոլումբիայի նախագահ (1978–1982), իսկ մայրը՝ լրագրող Դիանա Տուրբայը, սպանվել էր 1991թ․-ին՝ պատանդ վերցված անձին ազատելու ձախողված գործողության ժամանակ․նրան առևանգել էին Պաբլո Էսկոբարի մարդիկ։
Մահափորձից հետո Ուրիբեին տեղափոխել էին «Սանտա Ֆե» կլինիկա, որտեղ վիրաբույժները շտապ վիրահատություն էին կատարել։ Չնայած առաջին օրվա դրական լուրերին, նրա վիճակը մնացել էր կրիտիկական։ Վերջին օրերին ուղեղում արյունազեղման հետևանքով վիճակը կտրուկ վատթարացել էր։ Նրա կինը՝ Մարիա Կլաուդիա Տարասոնան, Instagram-ում գրել է. «Դու միշտ կլինես իմ կյանքի սերը։ Շնորհակալ եմ սիրով լի կյանքի համար»։
Միգել Ուրիբեի սպանությունը Կոլումբիայում վերստին սրել է 1980–1990-ականների ոճով բռնության նոր ալիքի վտանգը, երբ քաղաքական գործիչների սպանությունները, թմրամոլների հարձակումները սովորական երևույթ էին։ Պաշտպանության նախարարությունը հայտարարել է ռեկորդային՝ 615 հազար եվրոյի պարգև՝ հանցագործության կազմակերպիչների մասին տեղեկության դիմաց։