Կորոնավիրուսից մահացած մոր հուղարկավորության ժամանակ վարակված աղջիկները ևս մահացել են

Կորոնավիրուսից մահացած 80-անց կնոջ հուղարկավորության ժամանակ արտակարգ իրավիճակի կանոնները չպահպանելու հետեւանքով նրա երկու դուստրերը վարակվել են, եւ նրանք նույնպես մահացել են. այս մասին այսօր ճեպազրույցին ասաց վարչապետ Նիկոլ Փաշինյանը: «Մենք այս դեպքով ունենք մեկ ընտանիքից մահացած երեք հոգի»,- նշեց նա՝ կրկին ու կրկին հորդորելով քաղաքացիներին պահպանել նշված բոլոր կանոնները՝ սոցիալական հեռավորությունը, դիմակների կրումը:

«Ինչո՞ւ ենք մենք ասում կրեք դիմակներ: Քանի որ այսօր Հանրապետությունում ունենք հազարավոր ասիմպտոմ դեպքեր. այսինքն, այդ մարդիկ նույնիսկ իրենք չգիտեն, որ հիվանդ են: Այդ մարդիկ չունեն որեւէ բողոք, որ դիմեն որեւէ առողջապահական հիմնարկ, թեստավորվեն եւ պարզվի նրանց՝ հիվանդ լինելու հանգամանքը: Նրանք, ովքեր գիտեն, որ իրենք հիվանդ են, նրանք ավելի զգույշ են, եւ հարազատներն էլ ավելի զգույշ են: Եվ այս պարագայում մենք այս պարզագույն կանոնների պահպանմամբ եթե նույնիսկ առնչվենք այդ ասիմպտոմ դեպքերի հետ, մենք ունենք 95 տոկոս հավանականություն, որ չենք վարակվի նրանցից: Եթե մենք ինքներս ենք ասիմպտոմ հիվանդ, ունենք 95 տոկոս հավանականություն, որ այս կանոնների պահպանման պարագայում չենք վարակի ուրիշների»,- ասաց վարչապետը: