Կրակելու հրաման տալիս է ոչ թե քաղաքական, այլ ռազմական ղեկավարությունը. ԳՇ պետի տեղակալ

 Հայաստանի քաղաքական ղեկավարությունը ՀՀ պետական տարածքում գտնվող Ադրբեջանի զինծառայողների ուղղությամբ չկրակելու հրաման չի տվել, կրակելու-չկրակելու որոշում է կայացնում ՀՀ ռազմական ղեկավարությունը,-մայիսի 27-ին լրագրողների հետ զրույցում այս մասին ասաց ԶՈՒ գլխավոր շտաբի պետի տեղակալ Էդվարդ Ասրյանը։

«Քաղաքական ղեկավարությունը այդպիսի հրաման չի տալիս։ Կրակելու հրաման տալիս է ռազմական ղեկավարությունը։ Քաղաքական ղեկավարությունը որոշում է հանգուցալուծման ուղղությունները, պայմանները։ Իսկ կրակելու կամ չկրակելու հարցը քննարկում և որոշումը կայացնում ենք մենք»,- ասաց Ասրյանը։

Հարցին՝ թե որ դեպքում կլինի կրակելու հրաման, Ասրյանը պատասխանեց, որ եթե լինեն համապատասխան նախանշաններ, որ հակառակորդը արդեն իսկ ձգտում է իր պայմանները թելադրել, միանշանակ կկիրառվի ռազմական ուժ, զենք և կոչնչացվեն ՀՀ պետական տարածքում գտնվող հակառակորդի բոլոր զինծառայողները։

Նրա խոսքով՝ ՀՀ զինված ուժերը հնարավորություն ունեն ցանկացած պայմաններում Ադրբեջանի զինծառայողներին գերեվարելու, սակայն դա հարցի լուծման չի բերի։ 

ԶՈՒ ԳՇ պետի տեղակալը նշեց, որ նույն գործողությունը կարող են իրականացնել Ադրբեջանի զինված ուժերը, որովհետև մեծ քանակությամբ զինծառայողներ կան կուտակված սահմանին։

 «Եթե մենք գնում ենք այս իրավիճակի հանգուցալուծման և մեր պետական սահմանի վերականգնման ճանապարհով, ունենք երկու ուղի։ Առաջինը՝ զենք չկիրառել, պայքարել, հարկադրել, բանակցել, ապացուցել և նրանց հետ շպրտել, և ունենք երկրորդ ճանապարհը՝ կիրառել ուժ, ստիպել հակառակորդին նահանջել»,-ասաց Ասրյանը։

Նրա խոսքով՝ գերեվարելը նույնպես ռազմական ճանապարհ է, սակայն այն խնդրի լուծման չի բերի. «Կարող ենք գնալ այդ ճանապարհով՝ գերեվարել հակառակորդին, նույնը կկատարի ինքը, կստացվի երկրորդ ուղղությունը՝ ռազմական բախում։ Բոլոր տարբերակները Գլխավոր շտաբում քննարկվում են, կկայացվեն համապատասխան որոշումներ»։