Հակառակորդը շտապում է, քանի որ Հայաստանը վերականգնվում է․ ակադեմիկոս

Հայաստանը պետք է իրականացնի արժեքային արտաքին քաղաքականություն, ինչը նոր ուղղություն է արտաքին քաղաքականությունում, Հանրային ռադիոյի հետ զրույցում ասել  է ակադեմիկոս Ռուբեն Սաֆրաստյանը՝ անդրադառնալով այսօր ստեղծված սահմանային իրավիճակին ու հակառակորդների իրական նպատակներին։ Ըստ նրա՝ թուրք–ադրբեջանական տանդեմի իրական նպատակն է՝ թուլացնել Հայաստանն ու դարձնել վասալ։ Սակայն Հայաստանը 44–օրյա պատերազմից հետո վերականգնվում է, ինչը տեսնելով էլ հակառակորդը շտապում է։

Լարվածություն առաջացնելով սահմանին՝ Բաքուն փորձում է ստիպել Երեւանին՝ գնալ զիջումների, մասնավորապես, Արցախի կարգավիճակի, Հայաստանի սահմանների հարցում  ու թուլացնել Հայաստանը՝ ասում է ակադեմիկոս Ռուբեն Սաֆրաստյանը։  Ստեղծված իրավիճակում, ըստ նրա, պետք է լրջորեն քննարկվի  ՀԱՊԿ մոնիտորինգային կենտրոնի տեղակայման հարցը։  Եվ եթե այս անգամ էլ ՀԱՊԿ–ը չկարողանա իրականացնել այն գործառույթները, որի համար ինքը ստեղծվել է, ապա լուրջ կասկածի տակ կդնի իր ապագան։

Սաֆրաստյանը աշխատանքի մի քանի ուղղություն է մատնանշում, բայց նախ՝ դուրս շպրտել թշնամուն մեր սահմաններից , նաեւ դիվանագիտական գործունեությանը մեծ ուշադրություն դարձնել։  Շատ երկրների մոտ սխալ  պատկերացումներ են ձեւավորվում Հայաստանի մասին, պետք է աշխատել  այս ուղղությամբ՝ հակառակը ներկայացնելու համար։  Պետք է ընդլայնել այն պետությունների շրջանակը, որոնք մեր հանդեպ բարյացկամ են։ Իրանն, օրինակ, ըստ թուրքագետի՝ կարեւոր երկիր է մեր տարածաշրջանում, թեեւ  ունի իր ինքնուրույն ուղղությունը։

«Իրանը կարեւոր երկիր է տարածաշրջանում, բայց  ունի իր խնդիրը՝ կապված Իրանի հյուսիսում թյուրքալեզու փոքրամասնության հետ։  Դրա համար պետք է Իրանի հետ շատ լուրջ աշխատել, խորացնել հարաբերությունները Թեհրանի հետ»։ 

Նրա կարծիքով՝ պետք է ՌԴ-ի հետ խորացնենք մեր հարաբերությունները, հասնենք Արցախի հարցի արդարացի լուծման,  օկուպացված տարածքների դեօպուպացիայի։