Համաճարակային իրավիճակը հանրապետությունում մնում է խիստ լարված․դեպքերը մայիսին աճել են 13 անգամ

Համաճարակային իրավիճակը հանրապետությունում մնում է խիստ լարված: Մարտի համեմատությամբ ապրիլին արձանագրվել է հիվանդության աճ 3անգամ, մայիսին՝ նույն ժամանակահատվածի համեմատությամբ, կորոնավիրուսային հիվանդության թիվն աճել է 13 անգամ: Այս մասին ճեպազրույցի ժամանակ ասաց ՀՎԿԱԿ տնօրեն Արտավազդ Վանյանը:

«Եվ  սա այն դեպքում, երբ մարտին գործում էին սահմանափակումները, շփումները քիչ էին և հնարավորություն կար կորոնավիրուսի տարածումը որոշակի առումով դարձնել վերահսկելի: Մայիսին մարտի համեմատությամբ ունենք 13 անգամ աճ:  Բավական լուրջ աճ է արձանագրվել: Սա խոսում է այն մասին, որ մեր մոտ սահմանափակումների վերացումից հետո հստակ եղան մարդկանց կուտակումներ, մեծ թվով շփումներ: Այդ մասին վկայում են այսօրվա թվերը»,-ասաց Վանյանը:ՀՎԿԱԿ տնօրենը խստորեն հորդորեց հնարավորինս զերծ մնալ և չմասնակցել հանդիսությունների, հարսանյաց, հուղարկավորության, ծննդյան, կնունքի և այլ արարողույունների: Անհրաժեշտության դեպքում դրանք անցկացնել սակավաթիվ, պահպանել ով սահմանված կանոնները:

«Վերջին վերլուծությունները ցույց են տալիս, որ հատկապես պետք է զերծ մնալ  թաղումների, հոգեհանգստի արարողություններին մասնակցելուց:  Վերջին մեր բռնկումները հենց այդ արարողությունների շրջանակներում եղան:

Նաև մեծ վտանգ է բակերում, հատկապես երեկոյան ժամերին մարդկանց կուտակումները: Վարակն այստեղից արագ տարածվում է:

Մարդիկ մասնակցում են ուխտագնացությունների: Հնարավոր չէ այդ ընթացքում պահպանել սոցիալական հեռավորությունն ու մնացած կանոնները, ինչը վարակի տարածման ուղղակի պատճառ է»,-նշեց ՀՎԿԱԿ տնօրենը:

Վանյանը մեկ անգամ ևս ընդգծեց. խանութներից օգտվել խիստ անհրաժեշտության դեպքում, հիմնականում մթերք ու սնունդ գնելիս, խուսափել մարդաշատ վայրերում զբոսնելուց: