Հայաստանում կվերակառուցվի 22 մարզային դպրոց

Պետությունը նախատեսում է 2020-ին պետական բյուջեի միջոցներով հիմնովին  նորոգել  և  վերակառուցել 8 միջին մասնագիտական ուսումնական հաստատություն և 22 մարզային հանրակրթական դպրոց,-այս մասին Ազգային ժողովում  2020 թվականի պետական բյուջեի մասին օրենքի նախագծի քննարկմանը տեղեկացրել է ՀՀ կրթության, գիտության, մշակույթի և սպորտի նախարար Արայիկ Հարությունյանը:

2020 թվականին կապիտալ շինարարական աշխատանքներ են կատարվելու հետևյալ դպրոցներում՝ Արարատի մարզի Դեղձուտի միջնակարգ դպրոցում, Արմավիրի մարզի Արգինայի միջնակարգ դպրոցում,  Գեղարքունիքի մարզի Լեռնահովիտի, Շատջրեքի, Ջիլի  միջնակարգ դպրոցներում:

Կապիտալ շինարարական աշխատանքներ են կատարվելու նաև Լոռու մարզի Մեդովկայի միջնակարգ դպրոցում, Հագվու միջնակարգ դպրոցում, ՀՀ Շիրակի մարզի Արեգնադեմի միջնակարգ դպրոցում, Բերդաշենի միջնակարգ դպրոցում, Կապսի միջնակարգ դպրոցում:

Սյունիքի մարզում կապիտալ շինարարական աշխատանքներ կլինեն  Հարժիսի միջնակարգ դպրոցում, Դարբասի միջնակարգ դպրոցում,  Կապանի թիվ 4 միջնակարգ դպրոցում,  ՀՀ Տավուշի մարզում Կիրանցի, Դովեղի միջնակարգ դպրոցներում:  

Իսկ Վայոց ձորի մարզում շինարարական աշխատանքներ կիրականացվեն Գոմքի, Չիվայի,  Եղեգիսի միջնակարգ դպրոցներում, Կոտայքի մարզում՝  Ջրառատի, Կաթնաղբյուրի միջնակարգ դպրոցներում,  Արագածոտնի մարզում՝ Լուսակնի և Գառնահովիտի միջնակարգ դպրոցներում:

Նախարարը նաև տեղեկացրել է, որ ռոբոտիկայի լաբորատորիաների համար 2018 թվականին լրացուցիչ գումարներ են հատկացվել` մոտ 800 մլն դրամ: Մինչև 2019 թվականի տարեվերջ  դպրոցների 50 տոկոսն ապահովված կլինի «Արմաթ» լաբորատորիաներով, որոնցում աշխատող մասնագետների աշխատավարձի համար պահանջվող գումարները նախատեսված են 2020 թ. պետական բյուջեում: Նախարարը նաև տեղեկացրել է, որ 2020 թվականին Հայաստանում կանցկացվի կենսաբանության միջազգային օլիմպիադան, որի կազմակերպման համար բազմաթիվ նոր լաբորատորիաներ են ձեռք բերվելու, որոնք  հետագայում կտրամադրվեն հանրակրթական դպրոցներին: Ընդհանուր առմամբ 2020 թվականի պետական բյուջեի նախագծում կրթության, գիտության, մշակույթի և սպրոտի նախարության համար նախատեսված է  21 ծրագիր, 176 միջոցառում, որոնց իրականացման համար առաջարկվում է  հատկացնել 179 մլրդ 459 մլն դրամ: