Հայաստան կներկրվեն «Ջոհնսոն և Ջոհնսոն» և «Նովավաքս» պատվաստանյութերը

Հայաստան կներկրվեն կորոնավիրուսի դեմ ամերիկյան արտադրության «Նովավաքս» պատվաստանյութի 300 հազար դեղաչափ և «Ջոհնսոն և Ջոհնսոն» պատվաստանյութի 50 հազար դեղաչափ: Այդ մասին այսօր ասուլիսի ժամանակ հայտնեց առողջապահության նախարար Անահիտ Ավանեսյանը:

Ներկրվող պատվաստանյութերից «Ջոհնսոն և Ջոհնսոն» պատվաստանյութը կիրառելի է մեկ դեղաչափով և նախատեսված է հենց 50 հազար անձանց համար, իսկ «Նովավաքս»-ը սահմանված է երկու դեղաչափով: Նախարարի պաշտոնակատարը նաև անդրադարձավ «Քովաքս Ֆասիլիթի» նախաձեռնության միջոցով «Պֆայզր» և «Մոդեռնա» պատվաստանյութերը Հայաստան ներկրելու հարցին:

««Քովաքսի» շրջանակներում մեզ համար բացվել էին հնարավորությունների պատուհաններ, և մենք հունվար ամսին ունեինք բացված փոքր քանակի պատուհան «Պֆայզրի» համար 15 հազար դեղաչափ՝ 7500 անձանց համար: Մենք այդ պահին համապատասխան ենթակառուցվածքներ չունեինք, քանի որ այդ պատվաստանյութը պահանջում է խիստ սառցե շղթայի պայմաններ: Մենք այդ պայմանները չունենք, և նման փոքր քանակի համար ներդրում անել նպատակահարմար չէր: Հիմա մեր միջոցներով և դոնոր կազմակերպությունների կողմից պետք է ներդրում արվի Հայաստանում սառցե շղթայի պայմաններ ստեղծելու համար, ինչը առաջիկա շաբաթներում կիրականացվի»,- ասաց Ավանեսյանը՝ շեշտելով՝ Հայաստանը ինքնաֆինանսավորվող երկիր է, և «Քովաքս Ֆասիլիթի» նախաձեռնության միջոցով մենք ոչ թե նվեր ենք ստանում «քովիդի» դեմ պատվաստումները, այլ գնում ենք: Ինչ վերաբերում է «Մոդեռնա» պատվաստանյութին, նախարարի պաշտոնակատարը շեշտեց, որ այն դեռևս բաց չէ նախաձեռնության անդամ երկրների համար:

Հայաստանում այժմ կիրառվում է կորոնավիրուսային հիվանդության դեմ երեք պատվաստանյութ՝ «Աստրազենեկա», «Սպուտնիկ» և «Կորոնավակ»: Հունիսի 8-ի դրությամբ Հայաստանում 103 հազար 317 պատվաստում է արվել, պատվաստվել է բնակչության շուրջ 3,5 տոկոսը: Պատվաստումներից 74 հազար 479-ը առաջին դեղաչափ են, 28 հազար 838-ը՝ երկրորդ: 39 հազար 875 պատվաստումն արվել է «Աստրազենեկայով», 22 հազար 875-ը՝ «Կորոնավակով», 40 հազար 567-ը՝ «Սպուտնիկ Վի»-ով:

Մինչև հուլիսի 7-ը Հայաստան է ներկրվել կորոնավիրուսի դեմ 279 հազար 460 դեղաչափ, որից 26,6 տոկոսը՝ 74 հազար 400 դեղաչափ անգլոշվեդական արտադրության «Աստրազենեկա»՝ 37 հազար 200 անձի համար՝ յուրաքանչյուրին 2 դեղաչափ, 8-12 շաբաթ միջակայքով, 37,5 տոկոս՝ 105 հազար 60 դեղաչափ ռուսական արտադրության «Սպուտնիկ Վի»՝ 52 հազար 530 անձի համար՝ յուրաքանչյուրին 2 դեղաչափ, առնվազն 21 օր միջակայքով, 35,7 տոկոսը՝ 100 հազար դեղաչափ չինական արտադրության «Կորոնավակ»՝ 50 հազար մարդու համար՝ յուրաքանչյուրին 2 դեղաչափ, 28 օր միջակայքով: Հուլիսի 7-ին ստացվել է ևս 15  հազար դեղաչափ «Սպուտնիկ Վի» պատվաստանյութի առաջին բաղադրիչ՝ 15 հազար անձի համար: